ముస్సోరి అకాడమీలో ఐఏఎస్‌లకు చంద్రబాబు పాఠాలు

ఆంధ్రప్రదేశ్‌ ముఖ్యమంత్రి చంద్రబాబునాయుడు ముస్సోరిలో సీనియర్ ఐఏఎస్‌ అధికారులకు పాలనా పాఠాలు బోధించారు. రాష్ట్ర విభజన అనంతరం ఆంధ్రప్రదేశ్ ఎదుర్కొన్న సవాళ్లు, సాధిస్తున్న విజయాలు, నూతన రాజధాని నిర్మాణం తదితర అంశాలపై ఆయన పవర్‌పాయింట్‌ ప్రజంటేషన్‌ ఇచ్చారు. ముస్సోరిలోని అఖిల భారత సర్వీసు అధికారుల శిక్షణా కేంద్రం ‘లాల్‌బహదూర్‌ శాస్త్రి నేషనల్‌ అకాడమీ ఆఫ్‌ అడ్మినిస్ట్రేషన్‌ (ఎల్‌బీఎస్‌ఎన్‌ఏఏ)’లో ఐఏఎస్‌ అధికారులకు 3 వారాల మిడ్‌ కెరీర్‌ శిక్షణ కార్యక్రమం ప్రారంభమైంది. వివిధ రాష్ట్రాలు, కేంద్ర పాలిత ప్రాంతాలకు చెందిన 450 మంది సీనియర్ ఐఏఎస్ అధికారులు పొల్గొన్న ఈ సమావేశంలో తొలి రోజైన సోమవారం (సెప్టెంబర్ 25) చంద్రబాబు స్ఫూర్తిదాయక ప్రసంగం ఇచ్చారు.

ఈ సందర్భంగా చంద్రబాబు మాట్లాడుతూ.. చాలాకాలం తర్వాత కేంద్రంలో సుస్థిర ప్రభుత్వం అధికారంలోకి వచ్చిందని, కీలక సంస్కరణలు, నిర్ణయాలు త్వరితగతిన తీసుకునేందుకు అవకాశం ఏర్పడిందని అన్నారు. పలు వ్యవస్థలు సాంకేతిక వినియోగంపై ఆధారపడే పనిచేస్తున్నాయని, టెక్నాలజీ ద్వారా పాలనను మరింత సులభతరం చేసే అంశంపై ఐఏఎస్‌లు దృష్టి సారించాలయని ఆయన అన్నారు.

ఈ కార్యక్రమం తర్వాత చంద్రబాబు.. ఢిల్లీ వెళ్లనున్నారు. కేంద్ర మంత్రులు నితిన్‌ గడ్కరీ, దేవేంద్ర ప్రధాన్‌‌ తదితరులను కలిసి రాష్ట్రానికి సంబంధించిన ప్రాజెక్టులు, వాటికి కేంద్ర సహకారంపై చర్చించనున్నారు.