చిన్నారి పాటకు చంద్రబాబు ఫిదా.. రూ.50వేల సాయం

ఓ చిన్నారి ఆలపించిన పాటకు చంద్రబాబు నాయుడు ముగ్దులయ్యారు. 12 ఏళ్ల వయసులో ఎలాంటి భయం లేకుండా ముఖ్యమంత్రి, మంత్రులు ఉన్న వేదికపైకి వచ్చి పశ్చిమగోదావరి జిల్లా విశిష్టతను తెలిపే గేయాన్ని ఆలపించిన ఆ చిట్టితల్లిని చంద్రబాబు మెచ్చుకోకుండా ఉండలేకపోయారు. ఆమెకు తల్లిదండ్రులు లేరని.. తాత, అమ్మమ్మల వద్ద పెరుగుతోందని తెలుసుకుని ఆమెకు రూ.50వేల సాయం ప్రకటించారు. అంతేకాకుండా ఆమె సోదరుడికి కూడా రూ.50వేలు ఇస్తామన్నారు. పశ్చిమగోదావరి జిల్లా తాళ్లపూడి మండలం వేగేశ్వరపురంలో సోమవారం ఏర్పాటు చేసిన జన్మభూమి-మాఊరు కార్యక్రమం దీనికి వేదికైంది.

ఆ బాలిక పేరు ఖండవల్లి శ్రీవల్లి. ఊరు.. పోడూరు మండలం జిన్నూరు. చదువు.. ఏడో తరగతి. కానీ జిల్లా విశిష్టతను తెలిపే గేయాన్ని అవలీలగా ఎంతో మధురంగా ఆలపించింది. ఆమె పాటకు ఫిదా అయిన చంద్రబాబు.. వేదికపైనే ఆ చిన్నారితో ముచ్చటించారు. అనంతరం మాట్లాడుతూ.. శ్రీవల్లితో పాటు ఆమె సోదరుడికి కూడా చేరో రూ.50 వేలు బ్యాంకులో డిపాజిట్‌ చేస్తామని ప్రకటించారు. గురుకుల పాఠశాలలో చదువుకునే అవకాశం కల్పిస్తామని వెల్లడించారు.