సోషల్ మీడియాలో మరింత రెచ్చిపోనున్న లోకేశ్.. చంద్రబాబు కీలక నిర్ణయం!

మాజీ మంత్రి లోకేశ్‌కు టీడీపీ అధినేత చంద్రబాబు నాయుడు కీలక బాధ్యతలు అప్పగించారు. పార్టీ సోషల్ మీడియా విభాగం బాధ్యతలు ఆయనకు అప్పగించారు. లోకేశ్ ఇకపై వ్యక్తిగతంగా సోషల్ మీడియా టీమ్‌తో సమన్వయం చేసుకుంటూ పార్టీకి సంబంధించిన విషయాలు, ఇతర రాజకీయ అంశాలపై పోస్టులు చేయడాన్ని పర్యవేక్షించనున్నారు. వారికి కావాల్సిన ముఖ్యమైన సమాచారాన్ని కూడా అందిస్తారు.

లోకేశ్‌కు చంద్రబాబు అప్పగించిన బాధ్యతలు చూస్తే కొంత మందికి ఆశ్చర్యం కలిగించవచ్చు. కానీ, రాజకీయాల్లో ఇప్పుడు సోషల్ మీడియా విభాగం చాలా కీలకమైంది. సమకాలీన రాజకీయాలు ఎక్కువగా దాని మీదే ఆధారపడి సాగుతున్నాయి. ఎన్నికల వేళ ఇది మరింత ప్రభావం చూపుతోంది. అలాంటి ప్రభావవంతమైన విభాగాన్ని లోకేశ్ అయితేనే సమర్థంగా నిర్వహించగలరని చంద్రబాబు భావించినట్లు తెలుస్తోంది.

లోకేశ్ కూడా ఇటీవల సోషల్ మీడియాలో యాక్టివ్‌గా ఉంటున్నారు. టీడీపీ అధికారపక్షం నుంచి ప్రతిపక్షంలోకి మారిపోయాక ప్రభుత్వంపై పదునైన విమర్శలు చేస్తూ ట్వీట్లు చేస్తున్నారు. మంత్రిగా ఉన్నప్పటి కంటే ప్రతిపక్ష నేతగా లోకేశ్ తన గళం బాగా వినిపిస్తున్నారని పార్టీలోనూ చర్చించుకుంటున్నారు. లోకేశ్ ఇప్పటికే టీడీపీ జాతీయ ప్రధాన కార్యదర్శి బాధ్యతలు నిర్వహిస్తున్న విషయం తెలిసిందే.