ఆడబిడ్డలకు అండగా ఉంటా..వాళ్ల జోలికొస్తే తాట తీయడమే: చంద్రబాబు

ఆడవాళ్లపై అఘాయిత్యాలు సమాజానికి మాయని మచ్చన్నారు సీఎం చంద్రబాబు. విజయవాడలో జరిగిన ఆడపిల్లలకు రక్షణగా కదులుదాం ర్యాలీలో పాల్గొన్న సీఎం... తర్వాత జరిగిన బహిరంగ సభలో మాట్లాడారు. రాష్ట్రంలో ఆడపిల్లల జోలికొస్తే ఊరుకునేది లేదని... మంచికి మంచిగా ఉంటానని... చెడు చేసేవారిని వదిలిపెట్టేది లేదని హెచ్చరించారు. ఆడపిల్లలు ఆనందందగా ఉండి... ధైర్యంగా రోడ్డు మీదకు రావాలన్నారు. ఆడబిడ్డలకు అండగా ఉంటానన్న సీఎం... వారి జోలికి వస్తే తాట తీస్తామన్నారు. రాబోయే రోజుల్లో ప్రజల్లో మరింత అవగాహన కల్పిస్తామని... సమాజంలో మార్పు తీసుకురావాల్సిన బాధ్యత ప్రతి ఒక్కరిపై ఉందన్నారు.

2014 పాదయాత్రలో అనకాపల్లికి చెందిన మహిళ తనను కలిసి... ఏం చేసినా చేయకున్నా ఫర్వాలేదని... ఆడపిల్లలకు మాత్రం రక్షణ కల్పించాలని అడిగిందని చంద్రబాబు గుర్తు చేసుకున్నారు. ఎవరైనా ఆడవాళ్లపై వేధింపులకు పాల్పడితే కఠిన చర్యలు తీసుకుంటామన్నారు. ఆడబిడ్డల జోలికి వెళ్తే ఉరిశిక్ష వేస్తారనే భయం రావాలని... అందుకే ఫోక్సో చట్ట సవరణపై అవగాహన పెంచాల్సిన అవసరం ఉందన్నారు. దాచేపల్లిలో జరిగిన ఘటన బాధాకరమని... చిన్న పిల్లలపై అఘాయిత్యాలకు పాల్పడే వారిని ప్రజలు ఛీ కొట్టాలన్నారు. మహిళలైతే అలాంటి వారిపై ఉమ్మివేసి... వాళ్లను నీచంగా చూడాలన్నారు.