అందుకే రాజమౌళి సలహా అడిగానన్న చంద్రబాబు

బాహుబలి లాంటి గొప్ప చిత్రాన్ని తెరకెక్కించిన గొప్ప దర్శకుడు ఎస్ఎస్ రాజమౌళి. అందుకే రాజధాని నిర్మాణం కోసం ఆయన సలహా అడిగాను. అందుకు రాజమౌళి కూడా సానుకూలంగానే స్పందించారు. మంచి రాజధాని నిర్మాణం కోసం మంచి సలహా ఇవ్వడానికి ఎవరు ముందుకొచ్చినా వారి అభిప్రాయాన్ని పరిగణనలోకి తీసుకోవడానికి తాము సిద్ధమే అని అన్నారు ఏపీ సీఎం చంద్రబాబు నాయుడు. రాజమౌళితోపాటు జీఎంఆర్, జీవీకే, శ్రీనిరాజు లాంటి ప్రముఖులు కూడా సలహాలు అందిస్తున్నారు అని ఈ సందర్భంగా సీఎం చంద్రబాబు స్పష్టంచేశారు. శాశ్వతంగా ఉండిపోవాల్సిన రాజధాని నిర్మాణాల కోసం సినిమా దర్శకుడి సహాయం తీసుకుంటే ఏం లాభం వుంటుందని సోషల్ మీడియాలో వ్యక్తమవుతున్న అభిప్రాయాలతోపాటు ఇంకొంతమంది ప్రతిపక్షనేతలు చేస్తున్న కామెంట్స్‌పై స్పందిస్తూ చంద్రబాబు ఈ వ్యాఖ్యలు చేశారు.

ఇతర రాష్ట్రాల్లో టీడీపీ పోటీ చేయడంపై స్పందించిన సీఎం చంద్రబాబు.. 'ప్రస్తుతానికి తెలంగాణ, ఏపీ తప్ప మిగతా ప్రాంతాల్లో పోటీ చేసే ఉద్దేశం టీడీపీకి లేదు' అని అన్నారు. తాము అధికారం కోసం పాకులాడటం లేదని చెబుతూ.. రెండుసార్లు ప్రధాని అయ్యే అవకాశం వచ్చినా తాను కాదన్నానని చంద్రబాబు అభిప్రాయపడ్డారు.