రేవంత్ రాజీనామా లేఖ నాకు అందలేదు...బాబు!

తెలంగాణ టీడీపీ నేత రేవంత్ రెడ్డి పార్టీ ప్రాథమిక సభ్యత్వానికి రాజీనామా చేసిన సంగతి తెలిసిందే. దీనిపై పార్టీ అధినేత, ఆంధ్రప్రదేశ్ ముఖ్యమంత్రి చంద్రబాబునాయుడు స్పందిస్తూ, రేవంత్ రాజీనామా లేఖ తనకు అందలేదని పేర్కొన్నారు. ప్రెస్ మీట్ తరువాత మాట్లాడదాం ఉండమని రేవంత్ రెడ్డికి చెప్పానని అన్నారు. విదేశీ పర్యటనలో ఏం జరిగిందన్నది రాష్ట్ర ప్రజలకు తెలియాల్సిన అవసరం ఉందని, అందుకే మీడియా సమావేశం పూర్తయిన తరువాత కలుద్దామని, అందర్నీ ఉండమని చెప్పానని ఆయన అన్నారు. మీడియా సమావేశం ముగిసిన తరువాత రేవంత్‌తో మాట్లాడతానని చెప్పినట్లు ఆయన తెలిపారు. అయితే, మీడియా సమావేశం జరుగుతుండగానే పార్టీ ప్రాథమిక సభ్యత్వానికి రాజీనామా చేసిన రేవంత్ రెడ్డి, ఆ లేఖని చంద్రబాబు నాయుడు పీఏకి ఇచ్చి బయటకి వచ్చేయడం విశేషం.

చంద్రబాబు విదేశీ పర్యటన గురించి మీడియా సమావేశం నిర్వహిస్తున్న సమయంలోనే సమావేశమందిరాన్ని రేవంత్ వీడి వెళ్లిపోయారు. పార్టీలో పరిణామాలు తనను చాలా ఇబ్బందిపెట్టాయని ఆరోపిస్తూ ఆయన రాజీనామా లేఖలో పేర్కొన్నారు. పార్టీపైనా, చంద్రబాబుపైనా తనకు చాలా గౌరవం ఉందని ఆయన స్పష్టం చేశారు. చంద్రబాబు తనకు తండ్రిలాంటి వారని అన్నారు. ఓపక్క కేసీఆర్‌పై తాను పోరాడుతుంటే, పార్టీ నేతలే ఆయనతో అంటకాగడం తనను ఇబ్బంది పెట్టిందని ఆయన ఆవేదన వ్యక్తం చేశారు.