రాష్ట్రపతిగా చంద్రబాబు, సీఎంగా నారా లోకేష్!

రాష్ట్రపతి ఎన్నికల్లో ఎవరిని అభ్యర్థిగా నిలబెట్టాలని ప్రధానమంత్రి నరేంద్రమోదీ, బీజేపీ అధిష్టానం మల్లగుల్లాలు పడుతుంటే.. టీడీపీ నేత టీజీ వెంకటేష్ మాత్రం సీరియస్ అంశాన్ని సింపుల్ గా తేల్చేశారు. ఏపీ సీఎం, టీడీపీ అధినేత చంద్రబాబు రాష్ట్రపతి పదవికీ అన్ని రకాలుగా అర్హుడని, ఆయనకే ఆ పదవిని కట్టబెట్టాలని డిమాండ్ చేశారు.

ఆదివారం తిరుమల శ్రీవారిని సందర్శించుకున్న టీజీ వెంకటేష్ మీడియాతో మాట్లాడారు. ఈ సందర్భంగా రాష్ట్రపతి పదవికి చంద్రబాబు నాయుడు కరెక్టని అన్నారు. పలు సందర్భాల్లో రాష్ట్రపతి, ప్రధానమంత్రులను ఎంపిక చేసిన చంద్రబాబు.. అత్యున్నత పదవైన రాష్ట్రపతిగా ఆయన్ను ఎన్నుకునేందుకు అన్ని అర్హతలూ ఉన్నాయన్నారు.

ముఖ్యమంత్రి పదవిని చంద్రబాబు తనయుడు నారా లోకేష్ కు కట్టబెడితే రాజ్యపాలన ఆయన చూసుకుంటారని చెప్పిన టీజీ.. బాబు రాష్ట్రపతి అయితే ఆంధ్రప్రదేశ్ మరింత అభివృద్ధి చెందుతుందని అభిప్రాయపడ్డారు.