ఖైదీ భార్యతో జైలు అధికారి అసభ్య ప్రవర్తన

జైలులో ఖైదీగా ఉన్న తన భర్తను కలవడానికి వచ్చిన మహిళ ఓ జైలు అధికారి అసభ్యంగా ప్రవర్తించాడు. దీంతో ఆ మహిళ పోలీసులకు ఫిర్యాదు చేసింది. దీనిపై విచారణ చేపట్టిన పోలీసులు ఆ అధికారిపై కేసు నమోదు చేశారు. ఈ ఘటన హైదరాబాద్‌లో చోటుచేసుకుంది. కుషాయిగూడ ఇన్‌స్పెక్టర్ చంద్రశేఖర్ చెప్పిన వివరాల ప్రకారం.. దమ్మాయిగూడకు చెందిన షిరాజాన్ భర్త జాన్ అబ్రహం ఓ హత్యకేసులో ముద్దాయిగా చర్లపల్లి కేంద్రకారాగారంలో జీవిత ఖైదు అనుభిస్తున్నాడు. కాగా, ఈ నెల 6న షిరాజాన్ తన భర్తను ములాఖత్ ద్వారా కలవడానికి జైలుకు వెళ్లింది.

అక్కడ జైలు డిప్యూటీ సూపరింటెండెంట్ సీహెచ్ దశరథం అడ్డదిడ్డమైన ప్రశ్నలు వేస్తూ ఆమెపై అసభ్యంగా ప్రవర్తించాడు. దశరథం చేష్టలతో చాలా ఇబ్బందికి, అవమానానికి గురైన షిరాజాన్ ఈనెల 8న కుషాయిగూడ పోలీస్ స్టేషన్‌లో ఫిర్యాదు చేసింది. విచారణ చేపట్టిన పోలీసులు ఐపీసీ సెక్షన్ 509 కింద దశరథంపై కేసు నమోదు చేసి దర్యాప్తు చేస్తున్నారు. అయితే దశరథం మాత్రం తాను ఏ తప్పు చేయలేదని అంటున్నారు. జైలు నిబంధనల ప్రకారం ములాఖత్ కోసం వచ్చిన మహిళను గుర్తింపుకార్డులు చూపించమని అడిగానే తప్ప అసభ్యంగా ప్రవర్తించలేదని అంటున్నారు.