వరంగల్ రామన్న కోసం చత్తీస్‌ఘడ్ పోలీసుల వేట

చత్తీస్‌ఘడ్‌లో ఇటీవల సీఆర్పీఎఫ్ జవాన్లపై విరుచుకుపడిన మావోయిస్టులు 25 మంది జవాన్లని బలి తీసుకున్న సంగతి తెలిసిందే. ఈ సుక్మా దాడి అనంతరం మరింత అప్రమత్తమైన కేంద్ర బలగాలు, పోలీసులు మావోయిస్టుల కోసం చత్తీస్‌ఘడ్ అడవుల్ని జల్లెడపడుతున్నారు. ఇక్కడ కూంబింగ్ నిర్వహిస్తూనే మరోవైపు దాడుల వెనుక కీలక వ్యక్తులైన మావోయిస్టుల ఆచూకీ కోసం తీవ్రంగా గాలింపు చేపట్టారు చత్తీస్‌‌ఘడ్ పోలీసులు. ఇందులో భాగంగానే వరంగల్ జిల్లాకు చెందిన రామన్న కోసం కూడా చత్తీస్‌ఘడ్ పోలీసులు వేట తీవ్రతరం చేశారు.

దండకారణ్యం స్పెషల్ జోనల్ కమిటీ (సీపీఐ మావోయిస్ట్)కి సెక్రటరిగా, సెంట్రల్ కమిటీ సభ్యుడిగా వున్న రావుల శ్రీనివాస్ అలియాస్ రామన్న ఆచూకీ తెలిపిన వారికి రూ. 40 లక్షల రివార్డ్ ప్రకటించింది చత్తీస్‌ఘడ్ రాష్ట్ర ప్రభుత్వం. రామన్న తలపై రూ.40 లక్షల రివార్డ్ ప్రకటిస్తూ ఆయుధాలతో యూనిఫామ్‌లో వున్న అతడి ఫోటోలతో కూడిన పోస్టర్లని విడుదల చేశారు చత్తీస్‌ఘడ్ పోలీసులు.

రామన్న ఆచూకీ చెప్పిన వివరాలు గోప్యంగా వుంచి వారికి రివార్డ్ అందజేయడం జరుగుతుందని పోలీసులు ఈ ప్రకటనలో స్పష్టం చేశారు. పోలీసులు తెలిపిన వివరాల ప్రకారం ప్రస్తుతం రామన్న వయస్సు 55 ఏళ్లు వుంటుందని తెలుస్తోంది. కుదిరితే రామన్నను ప్రాణాలతో పట్టుకోవాలి లేదంటే, అతడి శవమైనా కళ్లచూడాలనే దృఢ నిశ్చయంతో వున్న పోలీసులు అతడి ఆచూకీ ఇచ్చేవారికోసం 12 కాంటాక్టు నెంబర్లని పోస్టర్లలో పేర్కొన్నారు.