బాల్యానికి మూడుముళ్లా.. ఇట్లు మీ...

బాల్యం మూడు ముళ్లనే బంధంలో చిక్కుకుపోతోంది. ఆడుతూ పాడుతూ గడపాల్సిన పసి ప్రాయంలో... పెళ్లి పీటలెక్కాల్సి వస్తోంది. కనీసం 18 ఏళ్లు నిండకముందే... బాలికల జీవితాలను సంసారమనే ఊబిలోకి నెట్టేస్తున్నారు పెద్దలు. తెలుగు రాష్టాల్లో పరిస్థితి మరీ దారుణంగా ఉంది. వెనుకబడిన జిల్లాల్లో ఏ ప్రాంతానికి వెళ్లినా గడపకో బాలిక వధువు కనిపిస్తుంది. జీవితంలో వారు కష్టాలను బయటి ప్రపంచానికి తెలియ చెప్పే ప్రయత్నం చేశారు కొంతమంది బాధితులు. ధైర్యంగా వారి కన్నీటి గాధను ఓ లేఖలో హైకోర్టు సీజే దృష్టికి తీసుకొచ్చారు. 11మంది బాలికలు రాసిన ఆ లెటర్ వారిని కదిలించింది. ఈ అంశాన్ని సీరియస్‌గా తీసుకొని పిల్‌గా స్వీకరించింది.

సీజేకు రాసిన లేఖలో వారు ఎదుర్కొంటున్న ఇబ్బందుల్ని వివరించారు. తమకు చిన్నతనంలోనే పెళ్లి చేశారని... అప్పటి నుంచి అష్టకష్టాలు పడుతున్నామని తెలియజేశారు. తమతో పాటు పుట్టిన పిల్లలు కూడా తరచూ అనారోగ్యంతో బాధపడాల్సి వస్తోందని... ఆస్పత్రికి వెళ్లి వైద్యం చేయించుకోవాలన్నా ఆర్థిక పరిస్థితి సహకరించడం లేదని ఆవేదన వ్యక్తం చేశారు. తమలాంటి బాధితులు రాష్ట్రవ్యాప్తంగా చాలామంది ఉన్నారని సీజే దృష్టికి తీసుకొచ్చారు. వచ్చేవారం ఈ పిల్‌ విచారణకు రానుంది.