సిట్‌తో సిట్టింగ్: చార్మి కాదు.. శ్యామ్ కె. నాయుడు

డ్రగ్స్ కేసులో మరో సినీ ప్రముఖుడు, సినిమాటోగ్రాఫర్ శ్యామ్ కె. నాయుడు గురువారం సిట్ ముందు విచారణకు హాజరవుతున్నారు. వాస్తవానికి సిట్ జారీ చేసిన నోటీసుల్లో పేర్కొన్న తేదీల ప్రకారం గురువారం విచారణకు హీరోయిన్ చార్మి హాజరుకావాల్సి ఉంది. అయితే తాను షూటింగ్‌లో బిజీగా ఉన్నానని, ఇప్పుడు విచారణకు హాజరుకాలేనని సిట్ అధికారులు వెల్లడించింది. విచారణ తేదీని మార్చాలని కోరింది. దీనికి అంగీకరించిన ఎక్సైజ్ అధికారులు.. శ్యామ్ కె. నాయుడుని విచారణకు పిలిపిస్తున్నారు. ఈరోజు ఉదయం 10 గంటలకు శ్యామ్.. సిట్ ముందు హాజరవుతారు.

షూటింగ్ కారణంగా ఈరోజు విచారణకు హాజరుకాలేకపోతున్న చార్మిని ఈనెల 26న విచారించాలని అధికారులు నిర్ణయించారు. అయితే చార్మి సిట్ కార్యాలయానికి వస్తారా లేదా అనే విషయంపై ఇంకా స్పష్టత లేదు. మహిళలను సిట్ కార్యాలయానికి పిలిపించి విచారించడం కాకుండా, ఎక్కడ ప్రశ్నించాలనే దానిపై నిర్ణయాన్ని వారికే వదిలేశారు. కాబట్టి చార్మి ఎక్కడ ఇష్టపడితే అక్కడకు సిట్ అధికారులు వెళ్లి చార్మిని విచారించనున్నారు. ఇక తొలిరోజు పూరి నుంచి సేకరించిన సమాచారం ఆధారంగా నేడు శ్యామ్‌ను విచారించడానికి అధికారులు సిద్ధమవుతున్నారు. పూరితో శ్యామ్ కె. నాయుడు సన్నిహితంగా ఉండటం, డ్రగ్స్ వ్యవహారంతో ఇద్దరికీ సంబంధాలున్నాయని అనుమానాలు రావడంతో ఆ కోణంలో సమాచారం రాబట్టాలని సిట్ అధికారులు చూస్తున్నారు.