పట్టణాల అభివృద్ధికి ప్రత్యేక చర్యలు: కేటీఆర్

రాష్ట్రంలోని పట్టణాల అభివృద్ధికి ప్రభుత్వం కట్టుబడి ఉందని, అందుకు అవసరమైన చర్యలు తీసుకుంటుందని మంత్రి కేటీఆర్ అన్నారు. బుధవారం అసెంబ్లీలో బడ్జెట్ పద్దులపై చర్చ జరిగింది. ఈ సందర్బంగా కేటీఆర్ మాట్లాడుతూ పురపాలక శాఖకు బడ్జెట్‌లో రూ.5,599 కోట్లు ఇప్పటికే కేటాయించామని, మరో రూ.5,000 కోట్లు కేటాయిస్తామని తెలిపారు. జీహెచ్‌ఎంసీ సమగ్ర అభివృద్ధికి రూ.1000 కోట్లు, హెచ్‌ఎండబ్ల్యూస్‌కు రూ.1,420 కోట్లు కేటాయించామని చెప్పిన కేటీఆర్...ఇంత పెద్దమొత్తంలో కేటాయించడం రికార్డని అన్నారు.

మై జీహెచ్‌ఎంసీ యాప్ ద్వారా జనన ధృవీకరణ సర్టిఫికేట్లను క్షణాల్లో ఇస్తున్నామని చెప్పారు. స్వచ్ఛ హైదరాబాద్ కార్యక్రమం మంచి ఫలితాలనిస్తోందని గుర్తు చేశారు. తెలంగాణ వ్యాప్తంగా ఉన్న 73 పట్టణాలను మల విసర్జనరహిత పట్టణాలుగా మార్చుతామని కేటీఆర్ అన్నారు.

నగరాల్లో అక్రమ నిర్మాణాల నియంత్రణకు బిల్డింగ్ ట్రైబ్యునల్ తీసుకొచ్చామని తెలిపారు. జీహెచ్‌ఎంసీలో అతిధరకే అందించే భోజన పథకం అన్నపూర్ణ క్యాంటీన్ల సంఖ్యను 150కి పెంచనున్నట్లు పేర్కొన్నారు. త్వరలో వరంగల్ పట్టణంలో కూడా రూ.5 కే భోజనం అందించే కార్యక్రమాన్ని అమలు చేస్తామని చెప్పారు.

హైదరాబాద్‌ నగరంలో ఇల్లు లేని నిరుపేదలకు లక్ష రెండ పడకల గదులతో ఇండ్లను కచ్చితంగా నిర్మించి తీరుతామని చెప్పిన కేటీఆర్.. ఇప్పటికే 18 వేల ఇండ్లకు టెండర్ల ప్రక్రియ పూర్తయిందని వెల్లడించారు.

యేడాది పొడవునా నాలాల శుద్ధి (మురికి కాల్వల క్లీనింగ్) కార్యక్రమం కొనసాగుతుందన్నారు. రూ.5000 కోట్ల మూలధనంతో హైదరాబాద్ రోడ్ ట్రాన్స్ పోర్టేషన్ కార్పొరేషన్‌ను ఏర్పాటు చేస్తామని ప్రకటించారు. రూ.500 కోట్లతో మూసీ రివర్ డెవలప్‌మెంట్ కార్పొరేషన్ ఏర్పాటు చేయనున్నట్లు తెలిపారు.

హైదరాబాద్ లో నైట్ బజార్ ల నిర్వహణపై త్వరలో ఓ నిర్ణయం తీసుకుంటామని కేటీఆర్ సభలో వెల్లడించారు.