రాజకీయ నాయకులు కాదు.. మనమే హీరోలం

మీరు ‘పోలీస్ స్టోరీ’ సినిమా చూశారా.. అందులో సాయికుమార్ ఆవేశంగా హోం మినిస్టర్‌తో మాట్లాడుతూ.. ‘మిస్టర్ హోం మినిస్టర్ మీరు కేవలం ఐదేళ్లే అధికారంలో ఉంటారు. అదీ గ్యారంటీ లేదు. కానీ నేను ఇంకా 30 ఏళ్లు సర్వీసులో ఉంటాను’ అని ఫైర్ అవుతాడు. ఇక్కడ పరిస్థితి అలాంటిది కాకపోయినా అంతరార్థం మాత్రం అదే. ‘పాలకులు వస్తుంటారు, పోతుంటారు.. కానీ సివిల్ సర్వెంట్లు మాత్రం 35 ఏళ్లు సర్వీసులో ఉండి ప్రజలకు సేవ చేస్తారు. రాజకీయ నాయకులు, సినిమా స్టార్లు హీరోలు కాదు. ఐఏఎస్, ఐపీఎస్ అధికారులే అసలైన హీరోలు’ అని ఓ ఐపీఎస్ అధికారి అన్నారు. ఆయనెవరో కాదు తెలంగాణ రెసిడెన్షియల్ ఎడ్యుకేషన్ సొసైటీ కార్యదర్శి డాక్టర్ ఆర్.ఎస్. ప్రవీణ్‌కుమార్.

వరంగల్ నగరంలో జరిగిన సివిల్స్ అధికారుల సన్మాన కార్యక్రమంలో ఈ వ్యాఖ్యలు చేశారు. 2015, 2016, 2017 బ్యాచ్‌లకు ఎంపికైన తెలుగు రాష్ట్రాలకు చెందిన ఐఏఎస్, ఐపీఎస్ అధికారుల సన్మాన కార్యక్రమం ఆదివారం రాత్రి నక్కలగుట్టలోని ఓ హోటల్లో జరిగింది. ఈ కార్యక్రమానికి ముఖ్య అతిథిగా హాజరైన ప్రవీణ్‌కుమార్.. కొత్తగా ఎంపికైన అధికారులనుద్దేశించి ప్రసంగించారు. వరంగల్‌లో మొట్టమొదటి సారి సివిల్స్ ర్యాంకర్లను సన్మానించడం అభినందనీయమని ఆయన అన్నారు. 24 ఏళ్ల క్రితం తాను సివిల్స్ పరీక్షలకు ప్రిపేర్ అయ్యానని, అప్పటితో పోలిస్తే ఇప్పుడు పరిస్థితులు చాలా మారాయని చెప్పారు. పిల్లలను ఐపీఎస్, ఐఏఎస్‌లుగా తీర్చిదిద్దే సంకల్పాన్ని తల్లిదండ్రులు తీసుకోవాలని, ఆ దిశగా వారిని ప్రోత్సహించాలని సూచించారు.