చిక్కుల్లో సివిల్స్ ర్యాంకర్ రోణంకి గోపాలకృష్ణ

అఖిల భారత సివిల్ సర్వీసిసెస్ (యూపీఎస్సీ) పరీక్షల్లో తప్పుడు అంగవైకల్యం ధ్రువీకరణ పత్రాలు సమర్పించి నేషనల్ లెవల్లో మూడో ర్యాంక్ సంపాదించాడని దాఖలైన ప్రజాప్రయోజన వ్యాజ్యంపై స్పందించిన ఉమ్మడి రాష్ట్రాల హైకోర్టు... మంగళవారం రోణంకి గోపాలకృష్ణకు నోటీసులు జారీ చేసింది. తప్పుడు ధ్రువీకరణ పత్రం సమర్పించిన రోణంకిని విచారించి తగిన చర్యలు తీసుకోవాలని హైదరాబాద్ కు చెందిన న్యాయవాది మురళీకృష్ణ ప్రజాప్రయోజన వ్యాజ్యం దాఖలు చేశారు.
ఓబీసీ కోటా కింద 110.66, వికలాంగుల కోటాలో 75.34 మార్కులను యూపీఎస్సీ కటాఫ్ మార్కులుగా నిర్ణయించిందని, ఓబీసీ కేటగిరికి చెందిన రోణంకి.. 91.34 మార్కులు సాధించారని పిటిషనర్ కోర్టు దృష్టికి తీసుకొచ్చారు. తప్పుడు ధ్రువీకరణ పత్రాలతో వికలాంగుల కోటాలో ర్యాంకు పొందారని చెప్పారు.

దీనిపై విచారణ చేపట్టిన హైకోర్టు నాలుగు వారాల్లో సమాధానం చెప్పాలని గోపాలకృష్ణతో పాటు యూపీఎస్సీ సంయుక్త కార్యదర్శి, కేంద్ర సిబ్బంది శిక్షణ వ్యవహారాల శాఖ కార్యదర్శి, ఆంధ్రప్రదేశ్ ప్రభుత్వ ప్రధాన కార్యదర్శులకు నోటీసులు జారీ చేసింది.

అయితే అంగవైకల్యానికి సంబంధించిన అన్ని రకాల పత్రాలు తన వద్ద ఉన్నాయని.. ఎలాంటి విచారణనైనా ఎదుర్కొంటానని రోణంకి చెబుతున్నారు. తనపై బురదజల్లేందుకే ఇలాంటి ఆరోపణలు చేస్తున్నారని ఆవేదన వ్యక్తం చేస్తున్నారు.