కడప: రూ.9లకే చీర, రూపాయికి బ్యాగ్.. క్యూ కట్టిన మహిళలు!

రెండేళ్ల కిందట నోట్ల రద్దు సమయంలో కర్ణాటకలోని బీదర్ పట్టణానికి చెందిన ఓ వస్త్ర వ్యాపారి ఖరీదైన చీరలను ఒక్క రూపాయికే అమ్మి అందర్నీ ఆశ్చర్యంలో ముంచెత్తిన విషయం తెలిసిందే. తాజాగా సంక్రాంతి పండుగను పురస్కరించుకుని అలాంటి ఆశ్చర్యకర ప్రకటనే కడపలో ఓ వస్త్రదుకాణం చేసింది. అయితే, ఇక్కడ మాత్రం రూ.9లకే చీరను విక్రయిస్తున్నారు. ఈ బంపరాఫర్ కడపలో ఓ వస్త్ర దుకాణం నిర్వాహకులు ప్రకటించారు. కేవలం రూ.9కే చీర విక్రయిస్తున్నట్లు ప్రకటించడంతో వందల సంఖ్యలో మహిళలు దుకాణం వద్ద బారులు తీరారు. ఉదయం ఆరు గంటలకే మహిళలు క్యూకట్టడంతో కిలోమీటర్ల మేర వేచి ఉన్నారు. రూ.9లకు చీర.. ఒక్క రూపాయికే బ్యాగు ఇస్తుండడంతో మహిళలు ఎగబడ్డారు.

చిన్నాపెద్దా తేడా లేకుండా చీరల కోసం తరలిరావడంతో అక్కడ సందడి నెలకుంది. దీంతో ఎలాంటి ఇబ్బందులూ తలెత్తకుండా పోలీసు చర్యలు చేపట్టారు. చాలామంది ఉదయాన్ని అక్కడకు చేరుకోవడంతో వారిని అదుపు చేయడానికి పోలీసులు రంగంలోకి దిగాల్సి వచ్చింది.

గతేడాది కర్ణాటక ఎన్నికల ముందు కూడా బీదర్‌‌లోని సృష్టి-దృష్టి షోరూం యజమాని చంద్రశేఖర్‌ ఒక్క రూపాయికి చీరలు అమ్మకం ప్రారంభించాడు. స్వతహాగా జేడీఎస్ పార్టీ వీరాభిమాని అయిన చంద్రశేఖర్, శాసనసభ ఎన్నికల్లో కుమారస్వామి విజయాన్ని కాంక్షిస్తూ ఒక్క రూపాయికి చీర స్కీము ప్రారంభించాడు. ఈ ఆఫర్‌ కేవలం 15 రోజులు మాత్రమే ఉంటుందని ప్రకటించడంతో మహిళలు దుకాణం ముందు క్యూ కట్టారు. తన అభిమాన నేత కుమారస్వామి మళ్లీ సీఎం కావాలంటే 5 లక్షల చీరలు పంచాలని కొద్ది రోజుల క్రితం తిరుమల వేంకటేశ్వర స్వామి కలలోకి వచ్చి చెప్పినట్లు చంద్రశేఖర్‌ అప్పట్లో వ్యాఖ్యానించాడు. ఏడుకొండలవాడి ఆదేశాల మేరకే తాను ఒక్క రూపాయికి చీర స్కీమును చేపట్టినట్టు వెల్లడించారు.