కేసీఆర్ రిటర్న్ గిఫ్ట్ ఇస్తే ఊరుకుంటామా తమ్ముళ్లూ!!

తెలంగాణ సీఎం కేసీఆర్‌ రిటర్న్‌ గిఫ్ట్‌ ఇస్తే తిరిగి తాము మూడు గిఫ్ట్‌లు ఇస్తామని ఏపీ సీఎం చంద్రబాబు నాయుడు అన్నారు. రిటర్న్ గిఫ్ట్ ఇస్తే చూస్తూ ఊరుకుంటామా.. వదిలే ప్రసక్తే లేదని టీడీపీ కార్యకర్తలను ఉద్దేశించి అన్నారు. శుక్రవారం (జనవరి 18) గుంటూరు జిల్లా సత్తెనపల్లిలో తారకరామసాగర్‌, వావిలాల ఘాట్‌ ప్రారంభించిన సందర్భంగా ఏర్పాటు చేసిన సభలో చంద్రబాబు మాట్లాడారు. ఈ సందర్భంగా వైసీపీ అధినేత జగన్, టీఆర్‌ఎస్ పార్టీపై తీవ్ర స్థాయిలో ధ్వజమెత్తారు. పనిలోపనిగా బీజేపీపైనా విమర్శలు గుప్పించారు.

కేసీఆర్‌, జగన్‌ కలిసినా ఏపీలో ఏమీ చేయలేరని చంద్రబాబు అన్నారు. దృఢ సంకల్పంతో ముందుకెళ్తాం తప్ప వెనకడుగేయమని స్పష్టం చేశారు. కులాల పేరిట ప్రజల్లో చిచ్చుపెట్టాలని కుట్రలు చేస్తున్నారని ఆయన ఆరోపించారు. ఏ ఆసరా లేక కులాల మధ్య చిచ్చుపెట్టి రాజకీయ లబ్ధి పొందాలని చూస్తున్నారన్నారు. అలాంటి నాయకులకు బుద్ధి చెప్పాల్సిన అవసరం ఉందని ప్రజలకు పిలుపునిచ్చారు.

‘కేసీఆర్‌ రిటర్న్‌ గిఫ్ట్‌ ఇస్తారట. మేమేమైనా చేతగానివాళ్లమా? మేం మూడు గిఫ్ట్‌లు తిరిగిస్తాం తప్ప వదిలి ప్రసక్తే లేదు’ అని చంద్రబాబు ఆగ్రహం వ్యక్తంచేశారు. తెలుగు ప్రజల ఆత్మగౌరవం కోసం పోరాడిన పార్టీ టీడీపీ అని.. రాష్ట్రాన్ని ఎవరు దెబ్బతీయాలని ప్రయత్నించినా రాజీలేని పోరాటం చేస్తామని అన్నారు. అది తమ నాయకుడు ఎన్టీఆర్‌ ఇచ్చిన స్ఫూర్తి అని చెప్పారు.

కోడి కత్తి కేసును ఎన్‌ఐఏకి ఇవ్వడం ద్వారా తమకు లేని అధికారాన్ని కేంద్రం తీసుకుందని చంద్రబాబు మండిపడ్డారు. సీబీఐని జగన్‌ మెడ మీద పెట్టి ప్రధాని మోదీ రాజకీయ లబ్ధి పొందాలని చూస్తున్నారని ఆరోపించారు. దేశ ప్రజలను అన్ని విధాలా ఇబ్బందులకు గురిచేసిన బీజేపీకి గుణపాఠం తప్పదన్నారు.

‘కోల్‌కతాలో రేపు సీఎం మమతా బెనర్జీతో సమావేశమవుతున్నా. దేశంలోని ప్రతిపక్షాలు హాజరువుతున్న ఈ సమావేశంలో అందరం చర్చించి అందరి సహకారంతో దేశాన్ని బీజేపీ బారి నుంచి కాపాడుకుంటాం. బీజేపీ పాలనలో దేశంలో వ్యవస్థలన్నీ భ్రష్టు పట్టాయి’ అని చంద్రబాబు అన్నారు.