ఆ డిమాండ్ అర్థరహితం: సీఎం కేసీఆర్

రైతుబంధు పథకాన్ని కౌలు రైతులకు వర్తింపజేయాలనే డిమాండ్ పూర్తిగా అర్థరహితమైనదని సీఎం కేసీఆర్‌ అన్నారు. రైతుబంధు పథకం అమలుపై సీఎం కేసీఆర్‌ శనివారం (జూన్ 30) ఉన్నతస్థాయి సమీక్ష నిర్వహించారు. ఈసందర్భంగా ఆయన మాట్లాడుతూ… అసలు కౌలు రైతులు ఎవరన్నది ఎవరూ స్పష్టంగా చెప్పలేరన్నారు. కౌలు రైతుల కోసం పంట పెట్టుబడి పథకాన్ని అమలు చేయడం లేదన్నారు. లీజుకు తీసుకున్న వారెవరూ ఆయా ఆస్తులకు హక్కుదారులు కారన్నారు. లీజు విషయంలో ఇతరులకు లేని నిబంధన కేవలం రైతులకే ఎందుకుండాలని ప్రశ్నించారు. ప్రభుత్వ రికార్డుల్లో ఎక్కడా కౌలు రైతుల వివరాలు నమోదు కాలేదని స్పష్టం చేశారు.

కౌలు రైతుల పేరుతో అసలు రైతుకు అన్యాయం చేయడం మంచిది కాదని సీఎం అన్నారు. రైతులకు పంట పెట్టుబడి ఇవ్వడం కోసమే ప్రభుత్వం రైతుబంధు పథకం అమలు చేస్తుంది. కౌలు రైతుల కోసం ఎంత మాత్రం కాదు. ఇది రైతుబంధు పథకమే తప్ప.. కౌలు రైతుబంధు పథకం కాదన్నారు. ప్రభుత్వ విధానానికి అనుగుణంగా రైతులందరికీ సాయం అందించేందుకు సిద్ధం కావాలని అధికారులను ఆదేశించారు.

కొందరు కౌలు రైతులకు రైతుబంధు కింద సాయం అందించాలని డిమాండ్ చేస్తున్నారు. కౌలు రైతులను ఎలా విస్మరిస్తారని వాదిస్తున్నారు. ఆ డిమాండ్ అర్థరహితమైనది. ఆ వాదనలో న్యాయం లేదు. ఎందుకంటే అసలు కౌలు రైతులు ఎవరన్నది ఎవరూ స్పష్టంగా చెప్పలేరు. ప్రభుత్వం దగ్గర కూడా కౌలు రైతుల వివరాలేవి లేవు. ప్రభుత్వ రికార్డుల్లో ఎక్కడా కౌలు రైతుకు సంబంధించిన వివరాలు నమోదు కాలేదని కేసీఆర్ తెలిపారు.

కౌలురైతు అని చెప్పబడే వారికి భూమిపై ఎలాంటి హక్కులేదు. అలాంటి వారికి ఏ ప్రాతిపదికన పెట్టుబడి సాయం అందించాలని సీఎం ప్రశ్నించారు. ఏ హక్కు లేనివారికి ప్రభుత్వ ఖజానా నుంచి డబ్బులు చెల్లిస్తే తప్పవుతుంది. ప్రభుత్వం అలాంటి తప్పు చేస్తే ప్రశ్నించాలి. కానీ అంతా సవ్యంగా జరుగుతుంటే తప్పుపట్టడం సమంజసం కాదని కేసీఆర్ పేర్కొన్నారు.