దేశంలోనే ధనికులుగా తెలంగాణా యాదవులు: కేసీఆర్

తెలంగాణలో 30 లక్షల మంది యాదవులున్నారనీ, వారిలో 4 లక్షల కుటుంబాలకు 75 శాతం సబ్సిడీతో గొర్రెల యూనిట్లను ఇస్తామని ముఖ్యమంత్రి కేసీఆర్ అసెంబ్లీలో ప్రకటించారు. రానున్న రెండేళ్లలో 88 లక్షల గొర్రెలను పంపిణీ చేయనున్నట్లు ఆయన తెలిపారు. అక్రమాలకు తావు లేకుండా పక్క రాష్ర్టాల నుంచి గొర్రెలను కొనుగోలు చేస్తామని ఆయన తెలిపారు. రెండేళ్లలో ఈ గొర్రెల సంఖ్య 4 కోట్లకు చేరుతుందనీ, ఒక్కో గొర్రెకు రూ. 5 వేల చొప్పున లెక్కేసినా రూ. 20 వేల కోట్ల విలువ చేసే గొర్రెలు మన రాష్ట్రంలో ఉంటాయని ఆయన వివరించారు. ఈ రకంగా తెలంగాణ యాదవులకు దేశంలోనే ధనికులుగా గుర్తింపు వస్తుందని ఆయన ఆశాభావం వ్యక్తం చేశారు. ప్రస్తుతం తెలంగాణకు పక్క రాష్ర్టాల నుంచి రోజూ 600 లారీల గొర్రెలు వస్తున్నాయని ఆయన వివరించారు.

గవర్నర్ ప్రసంగంపై ధన్యవాద తీర్మానం సందర్భంగా ముఖ్యమంత్రి అసెంబ్లీలో మాట్లాడారు. ఎస్టీ, ముస్లిం రిజర్వేషన్ బిల్లులను ఈ బడ్జెట్ సమావేశాల్లోనే పాస్ చేయబోతున్నామని ముఖ్యమంత్రి పేర్కొన్నారు. ముస్లిం మైనార్టీలను గత ప్రభుత్వాలు ఓటు బ్యాంకుగానే చూశాయి తప్ప.. వారి సంక్షేమం గురించి ఏనాడూ పట్టించుకోలేదని ఆయన అన్నారు. మైనార్టీల సంక్షేమం కోసం ప్రభుత్వం కట్టుబడి ఉందని ఆయన పునరుద్ఘాటించారు.