నేడు కరీంనగర్‌లో సీఎం కేసీఆర్ బస..

సీఎం కేసీఆర్ కరీంనగర్‌కు చేరుకున్నారు. ప్రగతిభవన్‌ నుంచి రాష్ట్రంలోని వివిధ ప్రాజెక్టుల పనులను పర్యవేక్షిస్తున్న కేసీఆర్.. క్షేత్రస్థాయిలో వాటి పనితీరును పరిశీలించలించడానికి బుధవారం (డిసెంబర్ 6) సాయంత్రం ప్రత్యేక హెలికాప్టర్‌లో నగరానికి విచ్చేశారు. ఈ సందర్భంగా ఆయనకు మంత్రులు ఈటల, ఎమ్మెల్యే గంగుల కమలాకర్, కరీంనగర్ మేయర్ తదితర ప్రజా ప్రతినిధులు ఘనంగా స్వాగతం పలికారు. కేసీఆర్ వెంట సాగునీటి వనరుల శాఖ మంత్రి హరీష్ రావు కూడా ఉన్నారు.

రెండు రోజుల పర్యటన నిమిత్తం కరీంనగర్ చేరుకున్న కేసీఆర్.. బుధవారం తీగలగుట్టపల్లిలో బ‌స చేయనున్నారు. ఇవాళ రాత్రి అధికారులు, నాయకులతో భేటీ అవనున్న సీఎం.. గురువారం ఉదయం తుపాకులగూడెం బ్యారేజీ నిర్మాణ ప్రాంతం, నిర్మాణంలో ఉన్న మేడిగడ్డ ప్రాజెక్టు, కన్నెపల్లి పంప్‌హౌస్, అన్నారం బ్యారేజీ, సిరిపురం పంప్‌హౌస్, గోలివాడ పంప్‌హౌస్‌ను సందర్శించనున్నారు.

శుక్రవారం.. మేడారం, రామడుగు వద్ద కాళేశ్వరం ప్రాజెక్టు నిర్మాణ పనులు, రాంపూర్ దగ్గర పంప్‌హౌస్ పనులు, మిడ్‌మానేరు పనుల పురోగతిని కేసీఆర్ పరిశీలించనున్నారు.