అమ్మ ఒడే మొదటి బడి: కేసీఆర్

తెలంగాణ అద్భుతమైన సాహిత్యాన్ని పండించిన మాగాణమని సీఎం కేసీఆర్ అన్నారు. భాగ్యనగరంలోని ఎల్బీ స్టేడియం వేదికగా శుక్రవారం (డిసెంబర్ 15) సాయంత్రం ఉపరాష్ట్రపతి వెంకయ్య నాయుడి చేతుల మీదుగా ప్రపంచ తెలుగు మహాసభలు వైభవోపేతంగా ప్రారంభమయ్యాయి. ఈ సందర్భంగా కేసీఆర్ మాట్లాడుతూ.. ఎంతోమంది సాహితీ కుసుమాలు వికసించిన నేల, అద్భుతమైన సాహితీ క్షేత్రం తెలంగాణ అని పేర్కొన్నారు. భాష గొప్పతనాన్ని పెంచే కృషి ఎప్పటికీ కొనసాగాలని ఆయన సూచించారు.

సరళమైన పదాలతో బమ్మెర పోతన భాగవతాన్ని అద్భుతంగా రాశారని ముఖ్యమంత్రి గుర్తు చేశారు. తెలంగాణ నేల ధిక్కార స్వరానికి ప్రతీకగా బమ్మెర పోతన నిలిచారని తెలిపారు. పోతన భాగవతానికి వ్యాఖ్య రాసిన గొప్ప కవి సీ నారాయణ రెడ్డి (సినారె) అని కొనియాడారు. ఆధునిక తరం తెలంగాణ కవులు గోరటి వెంకన్న, అందెశ్రీ, జయరాజ్ కవితలను వినిపించి కేసీఆర్.. సభికుల హర్షధ్వానాలు అందుకున్నారు.

ఎంత గొప్పవారికైనా అమ్మ ఒడే మొదటి బడని సీఎం కేసీఆర్ అన్నారు. జోల పాటతోనే తల్లి తన బిడ్డలకు సాహిత్యాన్ని అలవాటు చేస్తుందని తెలిపారు. చిన్నతనంలోనే తన అమ్మ, నాన్న, గురువు నేర్పించిన పద్యాలు చెప్పి ఆకట్టుకున్నారు. ప్రముఖ కవుల గొప్ప గొప్ప వర్ణనలను అనర్గళంగా చెప్పి భాషాభిమానుల జేజేలు అందుకున్నారు. అంతకుముందు తన గురువు బ్రహ్మశ్రీ వేలేటి మృత్యుంజయ శర్మకు కేసీఆర్ వందనం చేసి శాలువాతో సత్కరించారు.

ప్రపంచవ్యాప్తంగా 42 దేశాలనుంచి 400 మంది ప్రముఖులు, వేలాది మంది భాషాభిమానుల రాకతో ‘తెలుగు మహాసభల’ ప్రాంగణం కిక్కిరిసిపోయింది. దేశంలోని 17 రాష్ట్రాలు, కేంద్ర పాలిత ప్రాంతం యానాం నుంచి ఎంతో మంది తెలుగు భాషా పండితులు, తెలుగు ప్రజలు హాజరయ్యారు.