‘నేను సర్కారు దవాఖానకే పోతా..’: కేటీఆర్

కేసీఆర్ ప్రభుత్వం వచ్చిన తర్వాత వైద్య రంగంలో విప్లవాత్మక మార్పులు వచ్చాయని, ప్రభుత్వ ఆసుపత్రులను బలోపేతం చేస్తున్నామని ఐటీ, పురపాలక శాఖ మంత్రి కేటీఆర్ అన్నారు. మంగళవారం (ఆగస్టు 22) ఆయన వైద్య ఆరోగ్య శాఖ మంత్రి లక్ష్మారెడ్డితో కలిసి సిరిసిల్ల ప్రభుత్వాసుపత్రిలో ఐసీయూ, డయాలసిస్, బ్లడ్ బ్యాంక్ కేంద్రాలను ప్రారంభించారు. సిరిసిల్లలో నర్సింగ్ కళాశాల భవనానికి కూడా శంకుస్థాపన చేశారు. ఈ సందర్భంగా కేటీఆర్ మాట్లాడుతూ.. ‘ఒకప్పుడు నేను రాను బిడ్డో సర్కార్ దవాఖానకు అనే పరిస్థితి ఉండేది. సీఎం కేసీఆర్ వచ్చిన తర్వాత.. నేను సర్కార్ దవాఖానాకే పోతా బిడ్డో అనే పరిస్థితి వచ్చింది’ అని కేటీఆర్ అన్నారు. రాష్ట్రవ్యాప్తంగా 40 డయాలిసిస్ కేంద్రాలు ఏర్పాటు చేశామని, సిరిసిల్ల జిల్లాలోనే 800 కేసీఆర్ కిట్లు అందజేశామని ఆయన చెప్పారు.

ప్రభుత్వ ఆసుపత్రులపై సామాన్యులకు నమ్మకం కలగాలంటే వైద్యులు ఎప్పుడూ అందుబాటులో ఉండాలని కేటీఆర్ పేర్కొన్నారు. ప్రతి ప్రభుత్వ ఆసుపత్రిలో వెబ్ కెమెరాలు ఏర్పాటు చేసి జిల్లా కేంద్రానికి అనుసంధానించాలని కలెక్టర్‌కు సూచించారు. ‘సిరిసిల్లలో రూ. 36.50 కోట్లతో నర్సింగ్ కళాశాలను ఏర్పాటు చేస్తున్నాం. వచ్చే సంవత్సరమే తరగతులను ప్రారంభిస్తాం. 100 పడకల ఆసుపత్రికి అదనంగా రూ. 13.50 కోట్లతో 50 పడకల మాతాశిశు సంరక్షణ కేంద్రానికి మంత్రి లక్ష్మారెడ్డి ఇప్పటికే ఉత్తర్వులు ఇచ్చారు’ అని కేటీఆర్ తెలిపారు.

అన్ని జిల్లా కేంద్రాల్లో జెనరిక్ ఔషధి కేంద్రాలను ఏర్పాటు చేస్తామని మంత్రి లక్ష్మారెడ్డి ప్రకటించారు. సిరిసిల్లలో డయాగ్నటిక్, జెనరిక్ ఔషధి కేంద్రాలను త్వరలోనే ప్రారంభిస్తామని ఆయన తెలిపారు. రాష్ట్రవ్యాప్తంగా 20 ఆసుపత్రుల్లో ఐసీయూ కేంద్రాలను ప్రారంభించినట్లు ఆయన తెలిపారు. చిన్న వయసులోనే గర్భసంచులు తొలగిస్తే మహిళలకు ఇబ్బందులు వస్తాయని, అనవసర శస్త్ర చికిత్సలు తగ్గించడానికి వైద్యులు కృషి చేయాలని ఆయన సూచించారు.