రెడ్డి హాస్టల్‌కు ఎన్ని కోట్లైనా ఇస్తా: కేసీఆర్

రాజాబహద్దూర్ వెంకటరామారెడ్డి చాలా గొప్ప వ్యక్తని తెలంగాణ ముఖ్యమంత్రి కె. చంద్రశేఖర్‌రావు అన్నారు. ఆయన ప్రాతఃస్మరణీయుడని.. వెంకటరామారెడ్డి పేరుతో హైదరాబాద్‌లో అంతర్జాతీయ స్థాయి ప్రమాణాలతో విద్యాసంస్థలు ఏర్పాటు కావాల్సిన అవసరం ఉందని కేసీఆర్ అభిలషించారు. ‘రాజా బహద్దూర్ వెంకటరామారెడ్డి చాలా గొప్ప వ్యక్తి. తెలంగాణ వైతాళికుడు. ఆయన స్థాంపించిన సంస్థలను తెలంగాణ చారిత్రక వారసత్వ సంపదగానే భావించాలి. బాలికల కోసం కూడా ప్రత్యేక వసతి గృహాన్ని ఆనాడే ఏర్పాటు చేశారు. అందుకే రెడ్డి హాస్టల్ కోసం 10 ఎకరాల స్థలాన్ని కేటాయించాం. రూ. 10 కోట్లు ఇచ్చాం. ఇంకా కావాలంటే మరో రూ. 10 కోట్లు అయినా ఇస్తాం. మరో ఐదెకరాల స్థలం కావాలని కోరారు.. అది కూడా కేటాయిస్తున్నాం’ అని కేసీఆర్ స్పష్టం చేశారు.

వెంకటరామారెడ్డి జయంతి వేడుకలు, రెడ్డిహాస్టల్‌ శతాబ్ది ఉత్సవాలను పురస్కరించుకొని హైదరాబాద్‌ శివారు బుద్వేల్‌లో విద్యాసంస్థలు, రెడ్డిహాస్టల్‌ భవన సముదాయానికి కేసీఆర్ మంగళవారం శంకుస్థాపన చేశారు. ఈ సందర్భంగా మాట్లాడుతూ వెంకటరామారెడ్డి ఖ్యాతికి తగ్గట్టుగా ఇక్కడ రెండో మూడో అంతర్జాతీయ స్థాయి విద్యాసంస్థలు ఏర్పాటు కావాలని అన్నారు. ‘రాజాబహద్దూర్ వెంకటరామారెడ్డి పేరు చరిత్రలో చిరస్థాయిగా నిలిచేలా మూడు, నాలుగు విద్యాసంస్థల టవర్లు ఈ కొండపై నిర్మించాలి. ఆ టవర్లు హైదరాబాద్ అంతా కనిపించాలి. మంచి కోర్సులు ఇందులో ఉండాలి. ఐఎస్‌బీలాంటి సంస్థలా తీర్చిదిద్ది, దేశంలోని ప్రముఖ కంపెనీలు ఇక్కడికే వచ్చి క్యాంపస్ రిక్రూట్‌మెంట్లలో విద్యార్థులకు ఉద్యోగాలు వచ్చేలా తీర్చిదిద్దాలి. ఇదే నా ఆకాంక్ష, కోరిక’ అని కేసీఆర్ చెప్పారు.

రెడ్డి హాస్టల్‌కు స్థలం ఇవ్వడాన్ని చిన్న విషయంగా చూడకూడదన్న సీఎం.. రాబోయే సమాజానికి ఇది ఉపయోగపడేదిగా చూడాలన్నారు. వెంకటరామారెడ్డి చారిత్ర పురుషుడని, పుట్టుకతోనే ధనవంతుడని కేసీఆర్ గుర్తు చేశారు. ‘వనపర్తి సంస్థనాదీశుల వారసుడు వెంకటరామారెడ్డి. అయినప్పటికీ పేదల విద్య కోసం తపించారు. కొత్వాల్‌గా విధులు నిర్వహిస్తూ కూడా నిజాంకు జడవకుండా తెలుగులో విద్యావాప్తికి కృషి చేశారు. అందుకే ఆయన పేరిట నెలకొల్పుతున్న హాస్టల్‌కు భూమి, నిధులు ఇచ్చాం. ఆయన కోసం ఏం చేసినా చంద్రునికో నూలుపోగు లాంటిదే. అయినా ఇది తెలంగాణ ప్రభుత్వ కర్తవ్యం. నాటి గొప్ప వ్యక్తులను గుర్తు చేసుకోవాలనే ఉద్దేశంతోనే తెలంగాణ ఏర్పడ్డ తొలినాళ్లలోనే పోలీస్‌ అకాడమీకి వెంకటరామారెడ్డి పేరు పెట్టాం’ అని కేసీఆర్ వెల్లడించారు.