లైంగిక వేధింపుల కేసు: ధర్మపురి సంజయ్‌కు బెయిల్ నిరాకరణ..

లైంగిక వేధింపుల ఆరోపణలు ఎదుర్కొంటున్న రాజ్యసభ సభ్యులు డీఎస్ కుమారుడు, నిజామాబాద్ మాజీ మేయర్ ధర్మపురి సంజయ్‌కు కోర్టులో చుక్కెదురైంది. ఈ కేసులో అరెస్టయిన సంజయ్‌‌ను పోలీసులు జైలుకు తరలించారు. దీంతో సంజయ్ బెయిల్ కోసం పిటిషన్ వేశారు. బెయిల్ పిటిషన్‌పై సోమవారం విచారణ జరిపిన జిల్లా ఎస్సీ, ఎస్టీ ప్రత్యేక న్యాయస్థానం పిటిషన్‌ను తిరస్కరించింది. కోర్టులో నిరాశ ఎదురుకావడంతో మరోసారి సంజయ్ తరఫు న్యాయవాదులు బెయిల్ కోసం పిటిషన్ వేసేందుకు ప్రయత్నిస్తున్నారు.

ధర్మపురి సంజయ్‌ తమను లైంగికంగా వేధిస్తున్నారంటూ.. నిజామాబాద్ శాంకరీ నర్సింగ్ కళాశాలకు చెందిన విద్యార్థినిలు, హోంమంత్రితోపాటు పోలీసులకు కూడా ఫిర్యాదు చేశారు. ప్రిన్సిపల్ లేని సమయంలో తన గదిలోకి పిలిపించుకొని వేధించేవాడని ఆరోపించారు. దీంతో పోలీసులు సంజయ్‌పై నిర్భయ చట్టం కింద కేసు నమోదు చేశారు.

సంజయ్‌ను అరెస్ట్ చేసేందుకు ప్రయత్నించగా అజ్ఞాతంలోకి వెళ్లారు. తనపై నమోదైన కేసులను కొట్టివేయాలంటూ సంజయ్ హైకోర్టులో క్వాష్ పిటిషన్‌ను దాఖలు చేశారు. ఈ పిటిషన్‌ను విచారణ జరిపి కోర్టు కొట్టేసింది. దీంతో అజ్ఞాతం వీడి పోలీసుల విచారణకు హజరు కావడంతో అరెస్ట్ చేసి జైలుకు తరలించారు.