తీరం వైపు వేగంగా దూసుకొస్తున్న వర్ద తుపాను

పెను తుపాను వర్ద.. కాస్త బలహీనపడి తీవ్ర తుపానుగా నేడు తీరం దాటనుందని విశాఖపట్నంలోని వాతావరణ కేంద్రం తెలిపింది. ఈ తుపాను దక్షిణాంధ్ర, ఉత్తర తమిళనాడు మధ్య.. చెన్నై నగరానికి సమీపంలో తీరం దాటనుందని వాతావరణ కేంద్రం అంచనా వేస్తోంది. ఈ రోజు ఉదయం ఐదున్నర గంటల సమయంలో ఈ తుపాను బంగాళాఖాతంలో... చైన్నైకి తూర్పున 150 కిలోమీటర్ల దూరంలో, నెల్లూరు తూర్పు ఆగ్నేయంగా 220 కి.మీ. దూరంలో ఉందని వాతావరణ శాఖ అధికారులు తెలిపారు. గంటకు 11 కిలోమీటర్ల వేగంతో కదులుతోన్న వర్ద... తీరం దాటాక నెల్లూరు, ప్రకాశం జిల్లాలో భారీ గాలులు వీస్తాయని వాతావరణ శాఖ తెలిపింది. తుపాను కాస్త బలహీనపడినప్పటికీ.. తీవ్ర తుపానుగానే పరిగణిస్తున్నట్లు అధికారులు చెప్పారు. నెల్లూరు జిల్లా సూళ్లూరుపేటలో ఇప్పటికే భారీ వర్షాలు కురుస్తున్నాయి. మధ్యాహ్నం రెండు గంటల సమయంలో తుపాను తీరం దాటే అవకాశం ఉంది.

తుపాను ప్రభావంతో దక్షిణాంధ్రలో భారీ వర్షాలు కురిసే వీలుందని.. ముఖ్యంగా నెల్లూరు, ప్రకాశం జిల్లాలో భారీ నుంచి అతి భారీ వర్షాలు కురిసే అవకాశం ఉందని వాతావరణ శాఖ తెలిపింది. ప్రస్తుతం గంటకు 20 కి.మీ. వేగంతో ఈదురు గాలులు వీస్తుండగా.. తుపాను తీరం దాటే సమయంలో దక్షిణాంధ్రలో గంటకు 80-100 కిలోమీటర్ల గాలులు వీయనున్నాయి. ప్రకాశం జిల్లాలో సముద్రం ఇప్పటికే 30 మీటర్ల మేర ముందుకు దూసుకొచ్చింది. గాలుల తీవ్రత పెరిగింది. తుపాను ప్రభావం తమిళనాడుపైనే ఎక్కువగా ఉన్నప్పటికీ.. ప్రజలు తగిన జాగ్రత్తలు తీసుకోవాలని, ఇళ్ల నుంచి బయటకు రావొద్దని అధికారులు సూచించారు. నెల్లూరు జిల్లాలోని కృష్ణపట్నం ఓడరేవులో పదో నెంబర్ ప్రమాద హెచ్చరిక జారీ చేయగా, నిజాంపట్నంలో తొమ్మిదో నంబర్ ప్రమాద హెచ్చరిక జారీ చేశారు. తుపాను ప్రభావిత ప్రాంతాల్లో హై అలర్ట్ కొనసాగుతోంది.