ఉత్తర కోస్తాకు వాయుగండం.. రైతుల్లో ఆందోళన

ఆరుగాలం శ్రమించి పండించిన పంట చేతికొచ్చే సమయంలో వాయుగుండం రూపంలో ముప్పు ముంచుకొస్తుందని తెలిసిన రైతులు తీవ్ర ఆందోళన వ్యక్తం చేస్తున్నారు. ఈ ఏడాది వర్షాలు ససమృద్ధిగా కురుసి సాగుకు అనుకూలించాయి. మరో వారం పదిరోజుల్లో ఉత్తర కోస్తాలో వరి కోతలు ప్రారంభం కాబోతున్నాయి. సరిగ్గా ఈ దశలోనే వరుణుడు కన్నెర్రజేస్తున్నాడని రైతులు వాపోతున్నారు. బంగాళాఖాతంలో ఏర్పడిన వాయుగుండం విశాఖపట్నానికి ఆగ్నేయంగా 80 కిలోమీటర్ల దూరంలో కేంద్రీకృతమై ఉంది. దీని ప్రభావంతో ఉత్తరకొస్తా వెంబడి గంటకు 60 నుంచి 80 కిలోమీటర్ల వేగంతో గాలులు వీస్తాయని, ఓ మోస్తరు నుంచి భారీ వర్షాలు కురిసే అవకాశం ఉందని వాతావరణశాఖ అధికారులు ప్రకటించారు. మత్స్యకారులు సముద్రంలోకి చేపలవేటకు వెళ్లవద్దని హెచ్చరించారు.

ఈ వాయుగుండం నెమ్మదిగా కదులుతోందని, ఒడిశా, ఉత్తరకొస్తా మధ్యలో తీరందాటే అవకాశం ఉందని తెలిపారు. ఉత్తర కోస్తా వెంబడి అన్ని పోర్టుల్లోనూ రెండో నెంబరు ప్రమాద హెచ్చరికలు జారీ చేశారు. ఈ నేపథ్యంలో ఉత్తరాంధ్ర రైతులు ఆందోళన చెందుతున్నారు. పంట కోతకు రావడంతోపాటు వాణిజ్య పంటగా వేసిన పెసలు, మినుములు మొలకెత్తుతాయా? అన్న ఆందోళనలో ఉన్నారు. వరుణుడి రాక రైతుకు ఆనందాన్నికలిగించినా, ఈ పరిస్థితుల్లో పిలవని చుట్టం వచ్చినట్టు బెంబేలెత్తిపోతున్నారు.