రేవంత్ రెడ్డి సభకు రాహుల్ గాంధీ రాక!

టీటీడీపీకి గుడ్‌బై చెప్పిన రేవంత్ రెడ్డి కాంగ్రెస్ పార్టీలో చేరేందుకు రంగం సిద్ధమైంది. రేవంత్ రెడ్డి రాకని స్వాగతిస్తున్న టీ కాంగ్రెస్ నేతలు పార్టీ ఉపాధ్యక్షుడు రాహుల్ గాంధీ ఆదేశాల మేరకు అన్ని ఏర్పాట్లు చేస్తున్నట్టు తెలుస్తోంది. మీడియాలో వస్తోన్న కథనాల ప్రకారం ఈ నెల 31వ తేదీన మధ్యాహ్నం 12:30 గంటలకి హైదరాబాద్‌లోని గాంధీ భవన్‌లో జరగనున్న సభలో రాహుల్ గాంధీ, పార్టీ రాష్ట్ర వ్యవహారాల ఇంచార్జ్ కుంతియా సమక్షంలో రేవంత్ రెడ్డి ఆ పార్టీలో చేరనున్నారని సమాచారం. అదే రోజు రాహుల్ గాంధీ ముఖ్య అతిథిగా ఓ భారీ బహిరంగ సభ సైతం ఏర్పాటు చేసేందుకు కాంగ్రెస్ పార్టీ వర్గాలు ప్లాన్ చేస్తున్నాయట. కాకపోతే భారీ బహిరంగ సభకు వేదిక ఎక్కడనే అంశంపైనే ప్రస్తుతానికి క్లారిటీ కొరవడింది.

అయితే, అంతకన్నా ముందుగా రేపు రేవంత్ రెడ్డి హైదరాబాద్‌లోని తన నివాసంలో అనుచరులతో భేటీ కానున్నారు. ఆ తర్వాత ఢిల్లీ వెళ్లి రాహుల్ గాంధీని కలిసొస్తారని, ఆ తర్వాతే పార్టీలో రేవంత్ చేరిక వుంటుందని పార్టీవర్గాలు చెబుతున్నాయి. రేవంత్ రెడ్డితోపాటు వేం నరేందర్ రెడ్డి నేతలు కూడా చేరే అవకాశం వుందని వార్తలు వెలువడుతున్నాయి.