ఏపీ: కోస్తాకు 'వాయుగండం'.. భారీ వర్ష సూచన

తిత్లీ నుంచి తేరుకుంటున్న ఆంధ్రప్రదేశ్‌కు మరో ముప్పు పొంచి ఉంది. బంగాళాఖాతంలో ఏర్పడిన అల్పపీడనం.. మరో రెండు రోజుల్లో బలపడి తీవ్ర వాయుగుండంగా మారి రాష్ట్రం వైపుగా దూసుకొస్తుందని వాతావరణశాఖ హెచ్చరిస్తోంది. ఈ ప్రభావంతో డిసెంబర్‌ 14 నుంచి 16 మధ్య కోస్తా జిల్లాల్లో భారీ వర్షాలు కురుస్తాయని.. అల్ప పీడనం కారణంగా సముద్రం అల్లకల్లోలంగా మారుతుందని అధికారులు చెబుతున్నారు.

వాయుగుండ ప్రభావం నెల్లూరు, ప్రకాశం, చిత్తూరు, కృష్ణా, ఉభయగోదావరి జిల్లాల్లో ఎక్కువగా ఉంటుదంటున్నారు. ఇక ఉత్తరాంధ్రలోనూ జల్లులు కురిసే అవకాశం ఉందంటున్నారు. వాయుగుండం ప్రభావంతో సముద్రంలో అలలు ఎగసిపడి అల్లకల్లోలంగా ఉంటుందని.. మత్స్యకారులు, తీర ప్రాంత ప్రజలు జాగ్రత్తగా ఉండాలని అధికారులు హెచ్చరిస్తున్నారు. మత్స్యకారులు సముద్రంలో చేపల వేటకు వెళ్లొద్దని.. గంటకు 70 నుంచి 100 మీటర్ల వేగంతో గాలులు వీచే అవకాశం ఉందంటున్నారు.