కార్డుల ద్వారా ఆర్టీసీ టిక్కెట్ల అమ్మకాలు

పెద్దనోట్ల రద్దు ఆర్టీసీ బస్సులపై తీవ్రప్రభావం చూపింది. చిల్లరదొరక్క..బస్సుల్లో పెద్ద నోట్లు తీసుకోక...ప్రయాణీకులు ప్రయాణాలు రద్దు చేసుకుంటున్నారు. దీంతో ప్రయాణీకుల సంఖ్య 2శాతం మేర తగ్గిందని తెలంగాణ ఆర్టీసీ చెబుతోంది.

నోట్లరద్దు కష్టాలను అధిగమించడంతోపాటు డిజిటల్ చెల్లింపులను ప్రోత్సహించేందుకు ఆర్టీసీ అధికారులు డెబిట్, క్రెడిట్ కార్డుల ద్వారా టిక్కెట్లు అమ్మాలని నిర్ణయించింది.

తొలుత మహాత్మాగాంధీ బస్ స్టేషన్, జూబ్లీ బస్ స్టేషన్, దిల్ సుఖ్ బస్ స్టేషన్లలో ప్రయాణీకులకు డెబిట్, క్రెడిట్ కార్డుల ద్వారా టిక్కెట్లు విక్రయించాలని అధికారులు భావిస్తున్నారు. ప్రయోగాత్మకంగా చేపట్టే ఈ కార్యక్రమాన్ని వచ్చే వారం నుంచే అమలు చేస్తామని అధికారులు చెబుతున్నారు.

మూడు దశల్లో రాష్ట్రవ్యాప్తంగా అన్ని బస్ స్టేషన్లలో కార్డు సౌకర్యాన్ని అందుబాటులోకి తీసుకురావాలని నిర్ణయించినట్లు తెలంగాణ ఆర్టీసీ మేనేజింగ్ డైరెక్టర్ జి.వి.రమణారావు ‘ఈనాడు’తో చెప్పారు.

ఇప్పటి వరకు ఆన్ లైన్ లో ఆర్టీసీ టిక్కెట్లు బుక్ చేసుకునే అవకాశం ఉంది. డెబిట్, క్రెడిట్ కార్డుల ద్వారా టిక్కెట్లు అమ్మకం ఇదే తొలిసారి.