ఆసుపత్రిలోనే వైద్యుడి హత్య

ఆసుపత్రిలోనే ఓ వైద్యుడు దారుణ హత్యకు గురయ్యాడు. అతని రెండో భార్య సోదరుడే ఆసుపత్రికి వచ్చి మరీ అతడిని చంపాడు. ఈ ఘటన మంగళవారం రాత్రి జరిగింది. పోలీసులు తెలిపిన వివరాల ప్రకారం... విజయనగర్ కాలనీకి చెందిన మిరాజుద్దీన్ (46) వైద్యుడిగా పనిచేస్తున్నాడు. అతనికి సొంత ఆసుపత్రి కూడా ఉంది. మల్లేపల్లి - విజయనగర్ కాలనీ రోడ్డులో మిరాజ్ కార్డియో క్లినిక్ అండ్ లైఫ్ కేర్ అనే ఆసుపత్రిని ఆయన నిర్వహిస్తున్నారు. రాత్రి పదిన్నర ప్రాంతంలో ఆసుపత్రిలోకి వచ్చిన అతని రెండో భార్య సోదరుడు నేరుగా మిరాజ్ గదిలోకి వెళ్లి అతనితో గొడవ పెట్టుకుని, వెంట తెచ్చుకున్న కత్తితో నరికి వెళ్లిపోయాడు. మిరాజ్ తీవ్రగాయాలతో తన గది నుంచి బయటికి వచ్చి అక్కడే పడిపోయి మరణించాడు. అనంతరం నిందితుడు హుమయూన్ నగర్ పోలీసుల వద్దకు వెళ్లి లొంగిపోయాడు.

మిరాజ్ ఇప్పటికీ మూడు పెళ్లిళ్లు చేసుకున్నాడు. మొదటి భార్యకు విడాకులిచ్చాడు. అయితే మొదట పెళ్లి జరిగిన సంగతి చెప్పకుండా రెండో పెళ్లి చేసుకున్నాడు. తరువాత ఆమెకు విషయం తెలిసింది. ఆ క్రమంలోనే ఆయన మూడో పెళ్లి చేసుకున్నాడు. రెండో భార్యకు మూడో పెళ్లి సంగతి కూడా తెలిసి వైద్యునితో గొడవ పెట్టుకుంది. తన సోదరుడికి మొదటి పెళ్లి, మూడో పెళ్లి విషయాల గురించి చెప్పింది. సోదరి జీవితాన్ని నాశనం చేశాడని భావించిన ఆమె సోదరుడు మిరాజ్ ను చంపేశాడు.