పరీక్షల పేరుతో మహిళపై వైద్యుడి అఘాయిత్యం

వైద్య వృత్తికే మచ్చతెచ్చే ఉదంతమిది. పరీక్షల కోసం వెళ్లిన మహిళపై ఓ డాక్టర్ అత్యాచారయత్నానికి ప్రయత్నించాడు. పైగా ఆ ప్రబుద్ధుడి పేరు రవీంద్రనాథ్‌ ఠాగూర్‌. నెల్లూరు జిల్లా పొదలకూరులో టైలర్స్‌కాలనీలో నివాసం ఉంటున్న ఓ గిరిజనురాలు.. ప్రస్తుతం ఏడునెలల గర్భిణి. అంగన్‌వాడీ కార్యకర్త సూచన మేరకు ఆమె పొదలకూరులోని సామాజిక ఆరోగ్య కేంద్రంలో వారం రోజులుగా పరీక్షలు చేయించుకుంటోంది. ఐరన్‌ ఇంజక్షన్‌ కోసం క్రమం తప్పకుండా రావాలని డాక్టర్‌ రవీంద్రనాథ్‌ ఠాగూర్‌ ఆమెకు సూచించాడు. అతడి సూచన మేరకు ఆ మహిళ రోజు తప్పంచి రోజు ఆరోగ్య కేంద్రానికి వస్తోంది.

శుక్రవారం (ఆగస్టు 11) ఇంజక్షన్‌ కోసం ఆసుపత్రికి వచ్చిన ఆ గిరిజనురాలిని పరీక్షల పేరుతో రవీంద్రనాథ్‌ తన గదిలోకి తీసుకెళ్లాడు. పిండం ఎదుగుదల తెలుసుకోవాలంటూ ఆమెను స్కానింగ్ కోసం పురమాయించాడు. 3 రోజుల కిందటే స్కానింగు తీశారు కదా ఆమె గట్టిగా ప్రశ్నించడంతో.. బిడ్డ హార్ట్‌బీట్‌ చూడాలంటూ మాట మార్చాడు. ఆ నెపంతో ఆమెతో అసభ్యంగా ప్రవర్తించడం మొదలుపెట్టాడు.

బాధితురాలు పెద్దగా కేకలు పెట్టుకుంటూ గదిలోంచి బయటకు రావడానికి ప్రయత్నిస్తుండగా.. ‘ఎవరితోనైనా చెబితే ప్రాణాలతో ఉండవు’ అంటూ బెదిరించాడు ఆ ప్రబుద్ధుడు. ఆ తర్వాత ఇంట్లో దిగాలుగా ఉన్న ఆ మహిళను చూసి ఆమె భర్త ఏమైందని ప్రశ్నించగా అసలు విషయం తెలిసింది. వెంటనే అతడు తన భార్యను వెంట పెట్టుకెళ్లి, పోలీస్ స్టేషన్‌లో ఫిర్యాదు చేశాడు. కేసు నమోదు చేసిన పోలీసులు రవీంద్రనాథ్‌ను అరెస్టు చేశారు.