Mparivahan: ఒరిజినల్ డ్రైవింగ్ లైసెన్స్, ఆర్సీలతో పనిలేదు: కేంద్రం

వాహనాల తనిఖీల సమయంలో వాహనదారుల వద్ద ఒరిజినల్ డ్రైవింగ్ లైసెన్స్, రిజిస్ట్రేషన్ సర్టిఫికెట్, బీమా పత్రాలు అవసరం లేదని కేంద్రం స్పష్టం చేసింది. ఐటీ చట్టంలోని నిబంధనల ప్రకారం ట్రాఫిక్ పోలీసులు అసలు ధ్రువపత్రాలను చూపాలని బలవంతం చేయరాదని పేర్కొంది. వీటికి బదులుగా డిజీలాకర్ లేదా ఎంపరివాహన్ లాంటి ప్రభుత్వ యాప్‌ల ద్వారా పొందిన ఎలక్ట్రానిక్ ధ్రువపత్రాలు కూడా చెల్లుబాటవుతాయని తెలిపింది. వాహనదారులు ట్రాఫిక్ నిబంధనలు ఉల్లంఘనలకు పాల్పడిన సమయంలో అసలు పత్రాలు లేకపోతే మొబైల్ సాయంతో సెంట్రల్ డేటాబేస్‌లోకి లాగిన్ అయి క్యూఆర్ కోడ్‌ను రికార్డుచేయాలని సూచించింది.

సిగ్నల్స్ జంపింగ్, వేగంగా వాహనం నడపడం, డ్రైవింగ్ చేస్తూ ఫోన్ మాట్లాడటం లాంటి ట్రాఫిక్ నిబంధనల ఉల్లంఘనలకు పాల్పడిన సమయంలో వాహనదారులు డ్రైవింగ్ లైసెన్స్‌లు, ఆర్సీలను పోగొట్టుకుంటారు. అనేక సందర్భాల్లో వాహనదారులు పోగొట్టుకున్న పత్రాలను గుర్తించడంలో రవాణా శాఖ విఫలమైనట్టు ఫిర్యాదులు అందుతున్నాయి. దీంతో కేంద్ర తాజాగా కొత్త నిబంధనలను తీసుకొచ్చింది. దీనికి సంబంధించి అన్ని రాష్ట్రాలకు సూచనలు చేసింది. కేంద్ర ఉపరితల రవాణా మంత్రిత్వ శాఖ తాజా నిబంధనల ప్రకారం.. వాహనం నడిపేవారు ట్రాఫిక్ ఉల్లంఘనలకు పాల్పడినప్పుడు ఒరిజనల్ ధ్రువపత్రాలను అవసరం లేకుండా వాహన్, సారథి డేటాబేస్ ద్వారా వారి వివరాలను పొందవచ్చు.

ఐటీ చట్టం 2000 ప్రకారం.. అసలు పత్రాలతో సమానంగా డిజీలాకర్, ఎంపరివాహన్‌లో లభించే వివరాలు చట్టబద్ధంగా గుర్తించబడతాయని కేంద్ర రవాణా మంత్రిత్వ శాఖ తెలిపింది. అంతేకాదు మోటార్ వాహనాల చట్టం 1988 కూడా డిజిటల్ పత్రాలను రవాణా శాఖ జారీచేసిన ధ్రుపత్రాలుగా పరిగణిస్తుందని పేర్కొంది. డిజీలాకర్ యాప్ అన్ని మొబైల్స్‌లోనూ అందుబాటులో ఉంటుందని, ఎంపరివాహన్ మాత్రం ఆండ్రాయిడ్ ఫోన్లకు మాత్రమే పరిమితమని స్పష్టం చేసింది. యాపిల్ లాంటి ఐఓఎస్ ఫోన్లతో మాత్రం మరో వారం పది రోజుల్లో అందుబాటులోకి తీసుకొస్తామని తెలియజేసింది.