మరి డా సూర్యకుమారి ఎలా చనిపోయింది ?

విజయవాడలో సంచలనం సృష్టించిన డాక్టర్‌ సూర్యకుమారి అనుమానాస్పద మృతి కేసులో నిందితుడిగా ఆరోపణలు ఎదుర్కుంటున్న మాజీ ఎమ్మెల్యే జయరాజు కొడుకు విద్యాసాగర్‌‌ని శనివారం అరెస్ట్ చేసిన పోలీసులు అతడిని ఇవాళ విజయవాడ కోర్టు ముందు హాజరుపరచగా కోర్టు అతడికి 14 రోజుల రిమాండ్‌ విధించింది.

6 రోజుల క్రితం అర్ధరాత్రి వేళ ఇంటి నుంచి బయటికి వెళ్లిన డా సూర్యకుమారి అదృశ్యమైందని ఆమె తల్లిదండ్రులు ఇచ్చిన ఫిర్యాదు మేరకు పోలీసులు మొదట మిస్సింగ్ కేసుగా నమోదు చేశారు. కానీ శనివారం రాత్రి రైవస్ కాలువలో ఆమె మృతదేహం లభించడంతో సూర్యకుమారిది అనుమానాస్పద మృతిగా కేసు నమోదు చేసిన పోలీసులు.. ఆమె తనకి తానే వచ్చి కాలువలో దూకి ఆత్మహత్య చేసుకుందా లేక ఎవరైనా చంపి కాలువలో పడేశారా అనే కోణంలో దర్యాప్తు ప్రారంభించారు.

సూర్యకుమారి అదృశ్యం వెనుక విద్యాసాగర్ ప్రమేయం వుండి వుంటుంది అని మొదటి నుంచి అనుమానిస్తున్న ఆమె తల్లిదండ్రులు... సూర్యకుమారి మృతదేహం లభ్యమైన అనంతరం దీని వెనుక అతడి హస్తం వుంది అని ఆరోపిస్తున్న నేపథ్యంలోనే పోలీసులు మరోసారి విద్యాసాగర్‌ని అదుపులోకి తీసుకున్నారు. ఇదిలావుంటే, విద్యాసాగర్ మాత్రం డా సూర్యకుమారి ఆత్మహత్యతో తనకి ఎటువంటి సంబంధం లేదు అని అన్నారు. సూర్యకుమారి తన ఇంటికి వచ్చిన మాట వాస్తవమే. ఆరోజు ఏం జరిగిందనే వివరాలన్ని పోలీసులని తెలిపాను. అందులో తనది ఏమైనా తప్పు వుంటే తనని శిలువేయండి అని పేర్కొన్నారు విద్యాసాగర్.