తెలంగాణ ఓటర్ల జాబితా ముసాయిదా విడుదల.. నేడు రాష్ట్రానికి సీఈసీ బృందం

తెలంగాణలో ఎన్నికలపై కసరత్తు మొదలయ్యింది. ఓటర్ల జాబితా, పోలింగ్ సిబ్బంది, ఈవీఎంలతో పాటూ మిగిలిన మౌలిక సదుపాయాలపై ఎన్నికల సంఘం దృష్టి పెట్టింది. ఈ మేరకు ఢిల్లీలో ఉన్న రాష్ట్ర ఎన్నికల ప్రధాన అధికారి రజత్‌కుమార్ కేంద్ర ఎన్నికల సంఘం ఉన్నతాధికారులతో చర్చించారు. అధికారులతో భేటీ తర్వాత ఆయన మీడియాతో మాట్లాడారు. తెలంగాణలో ముందస్తు ఎన్నికల నిర్వహణపై ఎలాంటి నిర్ణయం తీసుకోలేదని రజత్ తెలిపారు. మంగళవారం సీఈసీ బృందం హైదరాబాద్ రాబోతోందని.. అధికారులకు ఎలాంటి సమాచారం ఇవ్వాలో ప్రధానంగా ఈ భేటీలో చర్చించామన్నారు. ఓటర్ల జాబితాలో తప్పులు ఉంటే తప్పనిసరిగా సవరిస్తామన్న ఆయన.. తెలంగాణలో ఎన్నికల కసరత్తు, సంసిద్ధత అంశాలను సంఘానికి వివరించామని చెప్పారు.

ఇటు ఓటర్ల జాబితా ముసాయిదాను కూడా సోమవారం ఎన్నికల సంఘం విడుదల చేసింది. 2018 మార్చిలో ప్రకటించిన ఓటర్ల జాబితాకు సవరణ చేపట్టనున్నారు. ఈ నెల 25 వరకు అభ్యంతరాలు, వినతులు స్వీకరిస్తారు. వచ్చే నెల 4కల్లా వాటిని పరిష్కరిస్తారు. వచ్చే నెల 8న ఓటర్ల తుది జాబితాను విడుదల చేయనున్నారు. ముసాయిదా జాబితా ప్రకారం ప్రస్తుతం రాష్ట్ర ఓటర్ల సంఖ్య 2,61,36,776 ఉన్నట్లు ఎన్నికల సంఘం తెలిపింది.

మరోవైపు మంగళవారం హైదరాబాద్ రానున్న సీఈసీ బృందం రాష్ట్రంలో ఎన్నికల ఏర్పాట్లపై చర్చించనుంది. ఓటర్ల నమోదు, సవరణలు, ఈవీఎంలు, వీవీప్యాట్‌లు, భద్రతపై ఈ టీమ్ దృష్టిసారించనుంది. అలాగే సచివాలయంలోని సీఈవో కార్యాలయంలో పార్టీలతో సమావేశం ఏర్పాటు చేశారు.ఒక్కో పార్టీ నుంచి ఇద్దరు లేదా ముగ్గురు ప్రతినిధులకు అవకాశం కల్పించారు. సమావేశానికి 15 నిమిషాల ముందే ప్రాంగణంలో ఉండాలని పార్టీలకు సూచించింది. గుర్తింపు పొందిన 9 రాజకీయ పార్టీలకు సమయం కేటాయించారు.

ఈ బృందం బుధవారం తెలంగాణలోని జిల్లా కలెక్టర్లు, ఎస్పీలతో సమావేశం నిర్వహిస్తారు. సాయంత్రం సీఎస్‌తో పాటూ డీజీపీతో ప్రత్యేకంగా సమావేశమవుతారు. రెండ్రోజుల పర్యటనలు, సమావేశాల తర్వాత ఎన్నికల నిర్వహణపై కేంద్ర ఎన్నికల సంఘానికి ఓ నివేదిక అందజేస్తుందట. ఆ రిపోర్ట్ ఆధారంగా ఎన్నికలపై సీఈసీ ఫైనల్‌గా ఓ నిర్ణయం తీసుకుంటుంది.