9న హైదరాబాద్‌కు ఈవీఎంలు.. 11న ఈసీ బృందం

తెలంగాణలో అసెంబ్లీ రద్దైన నేపథ్యంలో కేంద్ర ఎన్నికల సంఘం కార్యాచరణ ప్రారంభించింది. రాష్ట్రంలో ఎన్నికల నిర్వహణ, అవసరమైన ఏర్పాట్లను పరిశీలించడానికి కేంద్ర ఎన్నికల సంఘం బృందం సెప్టెంబర్ 11 నుంచి తెలంగాణలో పర్యటించనుంది. ఎన్నికల సంఘం సీనియర్‌ డిప్యూటీ కమిషనర్‌ ఉమేశ్‌ సిన్హా నేతృత్వంలో ఓ బృందం ఢిల్లీ నుంచి హైదరాబాద్‌కు రానుంది. రాష్ట్ర ఎన్నికల ప్రధాన అధికారి రజత్ కుమార్ ఈ వివరాలను మీడియాకు వెల్లడించారు.

ఉమేశ్‌ సిన్హా బృందం రాష్ట్రంలో రెండు రోజుల పాటు పర్యటిస్తుందని రజత్ కుమార్ తెలిపారు. కేంద్ర ఎన్నికల సంఘానికి చెందిన బృందం 11న రాష్ట్రానికి వస్తుందని, వివిధ పార్టీలతో భేటీ అవుతుందని తెలిపారు. ఎన్నికల ఏర్పాట్ల పరిశీలన చేస్తుందని వెల్లడించారు. 4 రాష్ట్రాలతో పాటు తెలంగాణలో ఎన్నికల నిర్వహణ సాధ్యసాధ్యాలపై చర్చిస్తుందని చెప్పారు. తెలంగాణలో ఎన్నికల నిర్వహణపై కేంద్ర ఎన్నికల సంఘానికి ఇప్పటికే ఓ నివేదిక పంపించామని ఆయన తెలిపారు.

9 నుంచి ఈవీఎంలు..
ఆదివారం (సెప్టెంబర్ 9) నుంచి రాష్ట్రానికి ఈవీఎంలు కూడా వస్తాయని రాష్ట్ర ఎన్నికల ప్రధాన అధికారి రజత్ కుమార్ తెలిపారు. 2014 ఈవీఎంలు పనిచేయవని వెల్లడించారు. బెంగళూరులోని భారత్ ఎలక్ట్రానిక్స్ లిమిటెడ్ నుంచి ఈవీఎంలు, వీవీ ప్యానళ్లు వస్తున్నాయని ఆయన తెలిపారు. తెలంగాణ కోసం 44,000 వీవీ ప్యానళ్లు 40,700 కంట్రోల్ యూనిట్లు వస్తున్నాయని ఆయన వెల్లడించారు. ఈ మేరకు ఈసీ నుంచి తమకు లేఖ అందని రజత్ కుమార్ తెలిపారు.

తెలంగాణ శాసనసభ రద్దు అయినట్టు తమకు సమాచారం అందిందని కేంద్ర ఎన్నికల ప్రధాన కమిషనర్‌ రావత్‌ అన్నారు. యంత్రాంగం సన్నద్ధత ఆధారంగా ఎన్నికలకు వెళ్తామని ఆయన తెలిపారు. ప్రభుత్వం రద్దయిన ఆర్నెల్లలో ఎన్నికలు నిర్వహించాలని సుప్రీంకోర్టు మార్గదర్శకాలు సూచిస్తున్నాయని, అందుకనుగుణంగానే తాము చర్యలు చేపడుతున్నామని ఆయన వెల్లడించారు.

చదవండి: సాధ్యమైనంత త్వరగా ఎన్నికలు - ఎలక్షన్ చీఫ్ రావత్