ఈ నగరానికి ఏమైంది? రోడ్లన్నీ ఖాళీ!!

నిత్యం రద్దీగా ఉంటే హైదరాబాద్‌ రోడ్లన్నీ ఖాళీగా దర్శనం ఇస్తున్నాయి. జూబ్లీహిల్స్, బంజారాహిల్స్, పంజాగుట్ట, సికింద్రాబాద్, చార్మినార్ మొదలైన ప్ర‌ధాన కూడ‌ళ్ల‌లో కూడా ట్రాఫిక్ లేక రోడ్లన్నీ బోసిపోతున్నాయి. సంక్రాంతి పండుగ సంద‌ర్భంగా ప్ర‌భుత్వ, ప్ర‌యివేటు సంస్థ‌ల ఉద్యోగులు సొంతూళ్ల‌కు వెళ్లిపోవ‌డంతో హైద‌రాబాద్‌లో రోడ్లు ఖాళీగా క‌నిపిస్తున్నాయి. వారం రోజుల పాటు నగరంలో నిత్యం రద్దీగా ట్రాఫిక్‌తో స్తంభించే రోడ్లు ఖాళీగా కనిపించడం కేవలం సంక్రాంతి పండుగ సమయంలోనే చూస్తుంటాము. ఈ సమయంలో నగరం దాదాపు సగం ఖాళీ అవుతుంది.

కాగా సంక్రాంతి పండుగకు తరలివెళ్లే అన్ని ప్రధాన రహదారులు కిటకిటలాడుతున్నాయి. హైదరాబాద్ - విజయవాడ జాతీయ రహదారిపై శనివారం వేకువ జామున భారీగా వాహనాలు నిలిచిపోయాయి. మరోవైపు పండగ సీజన్‌లో వారం రోజుల ముందు నుంచీ ఆన్‌లైన్‌ రిజర్వేషన్‌లోనూ సీట్లు దొరక్క ప్రయాణికులు ఇబ్బంది పడుతున్నారు. ఇక ప్రైవేటు ట్రావెల్స్ ఈ సీజన్‌ను క్యాష్ చేసుకునేందుకు ఇష్టారాజ్యంగా టికెట్ రేట్లను పెంచేశారు. హైదరాబాద్ నుండి ఎటుపోవాలన్నా 2 వేలకంటే ఎక్కువే వసూలు చేస్తున్నారు. దీంతో రైలు ప్రయాణం చేయాలన్నా.. రెండు నెలల క్రిందటే రిజర్వేషన్లు పూర్తవడంతో పాటు అదనపు ఛార్జీలతో నడిపే ప్రత్యేక రైళ్లలో సీట్లు నిండిపోయాయి. దీంతో దూరప్రయాణం చేసే ప్రయాణికులు ఇబ్బందులు పడుతున్నారు.