ప్రతిపక్ష నేతగా జగన్ భేష్ .. బాబు చెప్పిన ఆ మాట నమ్మను: దగ్గుబాటి

మాజీ మంత్రి దగ్గుబాటి వెంకటేశ్వరరావు చాలా రోజుల తర్వాత మీడియా ముందుకు వచ్చారు. విజయవాడలో ఓ కార్యక్రమానికి హాజరయ్యేందుకు వచ్చిన ఆయన.. ఆంధ్రప్రదేశ్ తాజా రాజకీయాలపై స్పందించారు. ఏపీ ప్రతిపక్ష నేతగా జగన్‌ పనితీరు బావుందన్నారు దగ్గుబాటి. ఆయన చేస్తున్న పాదయాత్రతో వైసీపీ పుంజుకొందని.. జనాల నుంచి కూడా మద్దతు భారీగా వస్తోందన్నారు. టీడీపీలో కూడా ఇదే అంశంపై చర్చ జరుగుతోందని వ్యాఖ్యానించారు.

రాష్ట్ర విభజన కష్టమైతే.. పోలవరం రాష్ట్రానికి వరమన్నారు దగ్గుబాటి. జాతీయ ప్రాజెక్ట్‌ను రాష్ట్రం చేపట్టాల్సిన అవసరం ఏంటని కూడా ప్రశ్నించారు. పోలవరం ముంపు మండలాలను ఏపీలో కలపకపోతే ప్రాజెక్ట్ సాధ్యమయ్యేది కాదన్నారు. ఆ మండలాలను కలపకపోతే సీఎంగా ప్రమాణం చేసేదిలేదన్న చంద్రబాబు మాటలు తాను నమ్మనన్నారు వెంకటేశ్వరరావు. అయితే పట్టిసీమ వల్ల కృష్ణా డెల్టా బతికిందన్నారు.

ఏపీ రాజధాని అంశంపైనా దగ్గుబాటి స్పందించారు. మహానగరాన్ని నిర్మించడం తప్పుకాదు.. మూడు పంటలు పండే భూమిని ఎందుకు వినియోగించాల్సి వచ్చిందో ఆలోచించాలన్నారు. ఇది ఓ రకంగా దేశ సంపదను అడ్డుకోవడమేనని అభిప్రాయపడ్డారు. అలాగే పర్యావరణం, వికేంద్రీకరణ అంశాలపై కూడ దృష్టి పెట్టాల్సిన అవసరం ఉందని.. ఇదే సందర్భంలో తెలంగాణ సచివాలయం ఎన్ని ఎకరాల్లో ఉందో కూడా గమనించాలన్నారు.

మళ్లీ పొలిటికల్ ఎంట్రీ లేదనే క్లారిటీ ఇచ్చారు దగ్గుబాటి. 2014లోనే తాను క్రియాశీలక రాజకీయాల నుంచి తప్పుకున్నానని.. ఏ పార్టీలో లేనని చెప్పారు. పురందేశ్వరి మాత్రం బీజేపీలో కొనసాగుతున్నారన్నారు. ఓట్లను కొనుగోలు చేసే సంస్కృతికి తాను పూర్తిగా వ్యతిరేకమని.. ప్రస్తుత పరిస్థితుల్లో ఎన్నికల ఖర్చు కోట్లు దాటిపోతుందన్నారు. అసెంబ్లీ స్థానానికి పోటీ చేయాలంటే కనీసం రూ.25కోట్లు ఖర్చు పెట్టాల్సి వస్తోందని అభిప్రాయపడ్డారు. ఇక ప్రధాని మోదీపైనా స్పందించిన దగ్గుబాటి.. ఆయన ఎలాంటి వ్యక్తిగత స్వార్థం లేని వ్యక్తన్నారు.