ఫేస్ బుక్ ఫ్రెండ్స్ లిస్ట్.. వైద్యురాలి మ‌ర‌ణానికి కారణమా?

విజయవాడలో వైద్యురాలు సుష్మ ఆత్మహత్య వ్యవహారంపై ఆమె బంధువులు అనుమానాలు వ్యక్తం చేస్తున్నారు. ఉరి వేసుకుని మరణించినట్టుగా కనిపిస్తున్నా ఆమెది ఆత్మహత్య కాదని వారు అంటున్నారు. భర్త సునీల్ ఆమెను హత్య చేసి ఉరివేశాడని వారు అంటున్నారు. సుష్మ ఒంటిపై గాయాలు కూడా ఉన్నాయని.. సుష్మ కుటుంబం తరపు లాయర్ చెప్పారు. అశోక్ నగర్ ప్రాంతానికి చెందిన డాక్టర్ సుష్మ రెండు రోజుల క్రితం అనుమానాస్పద స్థితిలో మరణించారు. సుష్మది హత్య అని అంటున్న కుటుంబ సభ్యులు.. భర్త సునీల్ పై చర్యలు తీసుకోవాలని డిమాండ్ చేస్తూ ఇంత వరకూ అంత్యక్రియలు కూడా నిర్వహించ లేదు. మృత‌దేహాన్ని సునీల్ ఇంటి ముందు పెట్టి ఆందోళనకు దిగారు.

సుష్మను సునీల్ తరచూ అనుమానించేవాడని, వేధించే వాడని.. ఫేస్ బుక్ ఫ్రెండ్స్ లిస్ట్ మీద కూడా అతడు అనుమానించి సుష్మను చిత్రహింసలు పెట్టేవాడని మృతురాలి బంధువులు ఆరోపిస్తున్నారు. అతడే ఆమెను హత్య చేసి ఆత్మహత్యగా చిత్రీకరించాడని వారు అంటున్నారు.

తమ కూతురు ఆత్మహత్య చేసుకునేంత పిరికిది కాదని సుష్మ తల్లి అన్నారు. ఆమెది హత్యేనని చెప్పారు. సుష్మ- సునీల్ లకు ఏడేళ్ల కూతురు ఉంది. సుష్మ కుటుంబీకుల ఆరోపణల మేరకు సునీల్ ను అదుపులోకి తీసుకుని పోలీసులు విచారణ చేపట్టారు. పోస్టు మార్టం రిపోర్టు వచ్చాకా స్పందిస్తామని పోలీసులు చెబుతున్నారు. ​