నర్సులపై దూసుకెళ్లిన కారు

కారు అదుపుతప్పి నర్సింగ్ విద్యార్థినులపైకి దూసుకువెళ్లడంతో 13 మంది గాయాలపాలయ్యారు. బంజారాహిల్స్ పోలీస్‌స్టేషన్ పరిధిలో ఈ ఘటన చోటుచేసుకున్నది. పోలీసుల వివరాల ప్రకారం.. ఫిలింనగర్‌లోని అపోలో నర్సింగ్ కళాశాలకు చెందిన విద్యార్థినులు పోలియోచుక్కలు వేసేందుకు వెళుతూ కిట్స్ కోసం మహాత్మాగాంధీనగర్ బస్తీలోని అపోలో అర్బన్ హెల్త్ ట్రైనింగ్ సెంటర్‌కు చేరుకున్నారు. అదేసమయంలో మహాత్మాగాంధీనగర్‌బస్తీకి చెందిన శ్రీకాంత్ (19) కారులో షేక్‌పేట వైపు అతివేగంగా వెళ్తున్నాడు.
ట్రైనింగ్ సెంటర్ సమీపంలో ఓ వ్యక్తిని తప్పించే క్రమంలో అదుపుతప్పిన కారు.. అక్కడే నిల్చున్న నర్సింగ్ విద్యార్థినులను ఢీకొట్టింది. దీంతో బీఎస్సీ నర్సింగ్ మూడో సంవత్సరం విద్యార్థిని లీనా (23), యోగిత (21)కు తీవ్రగాయాలయ్యాయి. మరో 11మంది విద్యార్థినులు గాయపడ్డారు. కారుడ్రైవర్ శ్రీకాంత్‌ను స్థానికులు పట్టుకుని పోలీసులకు అప్పగించారు.