బావర్చీ వద్ద అగ్ని ప్రమాదం..

హైదరాబాద్ నగరంలోని ప్రముఖ బిర్యానీ కేంద్రం ‘బావర్చి’ వద్ద అగ్నిప్రమాదం చోటు చేసుకుంది. ఆర్టీసీ క్రాస్ రోడ్స్‌లోని ఈ హోటల్‌ వద్ద ఒక్కసారిగా మంటలు ఎగసిపడటంతో ఆందోళనతో జనం పరుగులు తీశారు. బావర్చీ వద్ద ఉన్న విద్యుత్ ట్రాన్స్‌ఫార్మర్‌లో షార్ట్ సర్క్యూట్ కారణంగా మంటలు చెలరేగినట్లు తెలుస్తోంది. ప్రమాదం జరిగిన ప్రాంతంలో బావర్చీ పార్సిల్ సెక్షన్ ఉంది. దాని పక్కనే ఇరుకైన సంధులో పార్కింగ్ ఉంది. ఈ అగ్ని ప్రమాదం వల్ల కొన్ని వాహనాలకు నష్టం కలిగినట్లు తెలుస్తోంది.

అకస్మాత్తుగా చెలరేగిన మంటలతో ఆ పరిసరాల్లో దట్టమైన పొగలు కమ్ముకున్నాయి. ప్రస్తుతం మంటలు ఆర్పే ప్రయత్నం చేస్తున్నారు. మధ్యాహ్నం సమయం కావడంతో బావర్చీ సెంటర్ భోజన ప్రియులతో కిక్కిరిసిపోయింది. ఇదే సమయంలో అగ్ని ప్రమాదం చోటు చేసుకుంది. ఈ ప్రమాదంలో ఎవ్వరికీ ఎలాంటి నష్టం జరగలేదు. ప్రమాదానికి సంబంధించిన పూర్తి వివరాలు తెలియాల్సి ఉంది.