వీడియో: షాగౌస్ రెస్టారెంట్‌లో అగ్నిప్రమాదం

నగరంలోని గచ్చిబౌలిలో ఉన్న ప్రముఖ షాగౌస్ రెస్టారెంట్‌లో అగ్ని ప్రమాదం సంభవించింది. గ్యాస్ లీకేజీ కావడంతో జరిగిన ప్రమాదంలో ఓ మహిళ సహా ఇద్దరికీ కాలిన గాయాలయ్యాయి. సమాచారం అందుకున్న వెంటనే రెండు ఫైరింజన్లతో సిబ్బంది అక్కడికి చేరుకుని మంటల్ని అదుపులోకి తెచ్చారు. శుక్రవారం మధ్యాహ్నం ఒంటిగంట సమయంలో ఈ ప్రమాదం చోటుచేసుకుంది.

మాదాపూర్ పోలీసుల కథనం ప్రకారం.. శాంతమ్మ అనే మహిళ కొత్తగూడలోని షా గౌస్ రెస్టారెంట్‌లో పనిచేస్తోంది. ఈ క్రమంలో గ్యాస్ సిలిండర్ లీక్ కావడంతో వంటగదిలో మంటలు చెలరేగాయి. వంటగదిలో ఉన్న శాంతమ్మకు మంటలు అంటుకున్నాయి. ఏం జరుగుతుందో చూసేందుకు వెళ్లిన మరో యువకుడికి కాలిన గాయాలయ్యాయి.

సమయానికి అగ్నిమాపక సిబ్బంది అక్కడికి చేరుకుని మంటల్ని అదుపులోకి తేవడంతో రెస్టారెంట్‌లో ఉన్న కస్టమర్లు ఊపిరి పీల్చుకున్నారు. అయితే పేలుడు లాంటిది సంభవిస్తుందేమోనని కొంత సమయం వారు ఆందోళనకు గురయ్యారు.

అగ్ని ప్రమాదంలో కాలిన గాయాలైన ఇద్దరిని సమీపంలోని ఆస్పత్రికి తరలించి చికిత్స అందిస్తున్నారు. అయితే శాంతమ్మ పరిస్థితి విషమంగా ఉందని తెలుస్తోంది. షాగౌస్ యాజమాన్యంపై ఐపీసీ 337, 338 సెక్షన్ల కింద కేసు నమోదు చేసి విచారణ చేపట్టారు.