Vijayawada to Singapore Flight: మళ్లీ నిరాశే.. బెజవాడ-సింగపూర్ విమాన సర్వీసు వాయిదా

నవ్యాంధ్ర ప్రజల ఆశలు మళ్లీ నిరాశయ్యాయి. విజయవాడ నుంచి ప్రారంభంకావాల్సిన అంతర్జాతీయ విమాన సర్వీసులు మళ్లీ వాయిదా పడ్డాయి. గురువారం (అక్టోబర్‌ 25) గన్నవరం ఎయిర్‌పోర్ట్ నుంచి ఎగరాల్సిన సింగపూర్ విమానం రద్దయ్యింది. సాంకేతిక కారణాలతో సర్వీసును వాయిదా వేసినట్లు ఇండిగో ఎయిర్‌లైన్స్ ప్రకటించింది. డిసెంబర్‌లో సింగపూర్‌ సర్వీసును ప్రారంభిస్తామని సంస్థ ప్రతినిధులు చెబుతున్నారు. విజయవాడ నుంచి అంతర్జాతీయ విమాన సర్వీసులు ప్రారంభమవుతాయని భావించిన ఏపీ సర్కార్‌కు నిరాశ తప్పలేదు.

ఆంధ్రప్రదేశ్ ప్రభుత్వ సహకారంతో ఇండిగో విమానయాన సంస్థ వారానికి రెండుసార్లు అంతర్జాతీయ విమానాలను విజయవాడ మీదుగా నడపడానికి సిద్ధమయ్యింది. 2009లో కస్టమ్స్ విభాగానికి చెందిన పేమెంట్ల బాధ్యత ఎయిర్‌పోర్ట్ అథారిటీ ఆఫ్ ఇండియా (ఏఏఐ) ఆధీనంలోకి తెస్తూ ప్రవేశపెట్టిన కొత్త నిబంధన వల్ల విజయవాడకు అంతర్జాతీయ హోదా కల్పించే అంశం ముందుకెళ్లలేదు. దీనిపై ముఖ్యమంత్రి చంద్రబాబు నాయుడు పౌర విమానాయాన శాఖ మంత్రి సురేష్ ప్రభుకు లేఖ రాయడంతో సమస్య పరిష్కారమైంది. దీంతో అక్టోబర్ 25 న సింగపూర్‌కు విమాన సర్వీసు ప్రారంభంకావాల్సింది.. కాని అది సాధ్యపడలేదు.

గన్నవరం ఎయిర్‌పోర్టుకు అంతర్జాతీయ హోదా వచ్చి ఏడాదిపైగా అవుతోంది. కాని ఇంటర్నేషనల్ సర్వీసులు లేకపోవడం పెద్ద లోటుగా ఉంది. దీంతో ఏపీ ప్రభుత్వం విమానసర్వీసును ప్రారంభించడానికి ప్రయత్నాలు చేసింది. తొలుత సింగపూర్‌ ఎయిర్‌లైన్స్‌ సంస్థతో రాష్ట్ర ప్రభుత్వం సంప్రదింపులు జరిపినా ముహూర్తం కుదరలేదు. కేంద్రం నుంచి క్లియరెన్స్ వచ్చాక.. ఇండిగో ఎయిర్‌లైన్స్ సంస్థ సర్వీసులు నడిపేందుకు ముందుకొచ్చింది. కాని మళ్లీ వాయిదాపడటంతో నిరాశ మిగిలింది. మరీ డిసెంబర్‌లోనైనా ఈ సర్వీసుకు మోక్షం కలుగుతుందో లేదో చూడాలి.