పవన్‌తో స్నేహంపై గద్దర్ మనసులో మాట

పవన్ కల్యాణ్ తనకి చిరకాల మిత్రుడు అని అన్నారు ప్రజా గాయకుడు గద్దర్. ప్రస్తుతం ఎక్కడికెళ్లినా పవన్ స్థాపించిన జనసేన పార్టీ గురించే వినబడుతోంది అని జనసేన పార్టీపై గద్దర్ తనకున్న అభిప్రాయాన్ని వెల్లడించారు. ధర్నా చౌక్‌ని అక్కడి నుంచి మరో చోటుకి తరలించాలన్న ప్రభుత్వం నిర్ణయాన్ని వ్యతిరేకిస్తూ ధర్నా చౌక్ పరిరక్షణ వేదిక ఆధ్వర్యంలో ఆదివారం జరుగుతున్న నిరసన దీక్షకి హాజరైన సందర్భంగా గద్దర్ ఈ వ్యాఖ్యలు చేసినట్టు తెలుస్తోంది. ఈ క్రమంలోనే తెలంగాణలో జనసేన పార్టీతో కలిసి పనిచేస్తారా అని మీడియా అడిగిన ప్రశ్నకి స్పందిస్తూ.. పవన్ తనకి మిత్రుడే కానీ అతడితో కలిసి పనిచేసేది లేనిది తాను పార్టీ ఏర్పాటు చేసిన తర్వాతే వెల్లడిస్తానని స్పష్టంచేశారు.

టీఆర్ఎస్ ప్రభుత్వానికి వ్యతిరేకంగా పోరాడేందుకు శక్తులన్నీ ఏకం కావాల్సిన అవసరం వుందని ఈ సందర్భంగా గద్దర్ అభిప్రాయపడ్డారు. ధర్నా చౌక్‌ని తరలించాలనే ప్రయత్నాన్ని అడ్డుకుంటామని, అవసరమైతే అసెంబ్లీనే ధర్నా చౌక్‌గా మార్చేస్తామని ప్రభుత్వాన్ని హెచ్చరించారు గద్దర్.