ఐసీయూలో సెల్‌ఫోన్‌తో నర్స్ బిజీ.. సస్పెండ్

ఐసీయూ యూనిట్‌‌లో విధులు నిర్వహిస్తూ.. సెల్‌ఫోన్‌లో పాటలు విన్న నర్సు తన ఉద్యోగాన్ని పొగొట్టుకుంది. హైదరాబాద్‌లోని గాంధీ ఆసుపత్రి ఐసీయూ యూనిట్‌లో కత్తుల సంధ్యారాణి కాంట్రాక్ట్ స్టాఫ్ నర్సుగా పనిచేస్తోంది. శుక్రవారం ఆమె విధుల్లో ఉండగా.. ఓ రోగి సహాయకుడు ఆమెని రోగికి చికిత్సకు సంబంధించిన సాయం అడిగాడు. కానీ.. ఫోన్‌లో పాటలు వింటూ ఎంజాయ్ చేస్తున్న ఆమె.. అతని అభ్యర్థనని పట్టించుకోలేదు.

నర్సు నిర్లక్ష్య వైఖరితో కంగుతిన్న సహాయకుడు తన సెల్‌ఫోన్‌తో ఆమె వ్యవహరిస్తున్న తీరుని.. రికార్డు చేశాడు. ఈ వీడియో సోషల్ మీడియాలో హల్‌చల్ చేయడంతో.. వైద్య ఆరోగ్య శాఖ స్పందించింది . ఆ శాఖ ఆదేశాల మేరకు నర్సుని విధుల్లోనుంచి తొలగిస్తున్నట్లు ఆసుపత్రి సూపరింటెండెంట్ ఆదేశాలు జారీ చేశారు. రోగుల్ని పట్టించుకోకుండా విధుల్లో నర్సు వ్యవహరించిన తీరుపై సర్వత్రా విమర్శలు వెల్లవెత్తాయి.