పడవ ప్రమాదం: మరో మృతదేహం వెలికితీత

గోదావరి నదిలో పడవ బోల్తా పడిన ఘటనలో గల్లంతైన వారిలో బుధవారం (జులై 18) మరో బాలిక మృతదేహం లభ్యమైంది. సహాయక బృందాలు చేపట్టిన గాలింపు చర్యల్లో ఇప్పటివరకు నాలుగు మృతదేహాలు దొరికాయి. ఇంకా ముగ్గురు బాలికల మృతదేహాలు లభ్యంకావాల్సి ఉంది. బుధవారం సాయంత్రం లభించిన మృతదేహం శేరిలంక గ్రామానికి చెందిన పోలిశెట్టి మనీష (15)దిగా గుర్తించారు. సూర్యనారాయణ, నాగలక్ష్మి దంపతుల కూమార్తె అయిన మనీష పశువుల్లంక ఉన్నత పాఠశాలలో పదో తరగతి చదువుతోంది.

యానాం ఫ్రాన్స్‌తిప్పకు చెందిన మత్స్యకారుల బృందం ఐ.పోలవరం మండలం కొమరగిరి పుష్కర ఘాట్‌ సమీపంలో మనీష మృతదేహాన్ని గుర్తించింది. అధికారులు బాలిక మృతదేహాన్ని పోస్టుమార్టం నిమిత్తం యానాం ప్రభుత్వాసుపత్రికి తరలించారు.

తూర్పుగోదావరి జిల్లా ఐ.పోలవరం మండలం పశువుల్లంకలో శనివారం జరిగిన పడవ ప్రమాదంలో మొత్తం ఏడుగురు గల్లంతైన విషయం తెలిసిందే. ఈ ఘటన లంక గ్రామాల్లో తీవ్ర విషాదం నింపింది. బాధితులంతా స్కూల్ విద్యార్థులే. గల్లంతైన వారికోసం సహాయక బృందాలు గత 5 రోజులుగా ముమ్మరంగా గాలిస్తు్న్నాయి. హోమంత్రి చినరాజప్ప అక్కడే ఉండి సహాయక కార్యక్రమాలను పర్యవేక్షిస్తున్నారు.