కొద్ది క్షణాల్లో గద్దెలపైకి సమ్మక్క.. అమ్మవార్లను దర్శించుకున్న ఛత్తీస్‌గఢ్ సీఎం

మేడారం జాతరలో అత్యంత కీలక ఘట్టానికి రంగం సిద్ధమైంది. మరికొద్ది గంటల్లో చిలుకలగుట్ట నుంచి బయలుదేరి సమ్మక్క తల్లి గద్దెలపై కొలువుదీరనుంది. గిరిజన సంప్రదాయాలతో, అధికారిక లాంఛనాలతో రాత్రి 8.30 గంటల సమయంలో సమ్మక్క తల్లి గద్దెలపైకి చేరనుంది. పోలీసు అధికారులు గాల్లోకి కాల్పులు జరిపి అమ్మవారికి ఘనంగా స్వాగతం పలుకుతారు. ఈ సందర్భంగా కొంత మంది భక్తులు పూనకంతో ఊగిపోతారు. ఈ అపురూప దృశ్యాలను కనులారా వీక్షించడానికి మేడారానికి ఇప్పటికే భక్తులు భారీ సంఖ్యలో చేరుకున్నారు. సమ్మక్క-సారలమ్మ నామస్మరణలతో వనం పులకరించిపోతోంది.

ఛత్తీస్‌గఢ్ ముఖ్యమంత్రి రమణ్ సింగ్ మేడారం జాతరం విచ్చేశారు. గురువారం (ఫిబ్రవరి 1) మధ్యాహ్నం ఛత్తీస్‌గఢ్ నుంచి ప్రత్యేక హెలికాప్టర్‌లో మేడారం చేరుకున్న రమణ్‌సింగ్‌.. అమ్మవార్ల గద్దెలను దర్శించుకున్నారు. తెలంగాణ ఉప ముఖ్యమంత్రి కడియం శ్రీహరి, దేవాదాయ శాఖ మంత్రి ఇంద్రకరణ్‌రెడ్డి ఆయనకు స్వాగతం పలికారు.

సమ్మక్క - సారలమ్మకు ప్రత్యేక పూజలు చేసిన రమణ్ సింగ్.. గద్దెలను దర్శించుకొని మొక్కులను సమర్పించుకున్నారు. తెలంగాణ శాసనసభ స్పీకర్ మధుసూదనాచారి కూడా అమ్మవార్లను దర్శించుకున్నారు.

మరోవైపు.. భారత ఉపరాష్ట్రపతి వెంకయ్యనాయుడు, సీఎం కేసీఆర్ శుక్రవారం మేడారం వెళ్లనున్నారు. ఈ నేపథ్యంలో అధికారులు కట్టుదిట్టమైన భద్రతా ఏర్పాట్లు చేస్తున్నారు.