కాళేశ్వరం ప్రాజెక్టు ఓ ఇంజనీరింగ్ అద్భుతం: గవర్నర్ నరసింహన్

కాళేశ్వరం ప్రాజెక్ట్ వెనక పెద్ద టీమ్ వర్క్ ఉందని, ఇదొక ఇంజనీరింగ్ అద్భుతమని గవర్నర్ నరసింహన్ అన్నారు. శనివారం (జనవరి 20) ఆయన ప్రతిష్టాత్మక కాళేశ్వరం ప్రాజెక్ట్‌ను సందర్శించారు. ప్రాజెక్టును చూసిన తర్వాత ముఖ్యమంత్రిని కాళేశ్వరం చంద్రశేఖర్‌ రావు అని పిలవాలనిపిస్తోందని గవర్నర్ చెప్పారు. తాను ఇప్పటివరకు మ్యాపుల ద్వారానే కాళేశ్వరం ప్రాజెక్ట్ గురించి తెలుసుకున్నానని, క్షేత్ర స్థాయిలో పనులు జరుగుతున్న తీరు తనను ఆశ్చర్యానికి గురి చేసిందని ఆయన తెలిపారు.

‘రాజ్‌భవన్ దర్బార్ హాల్‌లో సాగునీటి రంగంపై సీఎం కేసీఆర్ 2 గంటల పాటు నాకు ప్రజెంటేషన్ ఇచ్చారు. మౌస్ పట్టుకుని స్క్రీన్ ప్రజెంటేషన్ ఇచ్చిన ముఖ్యమంత్రులను గతంలో చూడలేదు. ముక్తేశ్వరుని సన్నిధిలో తలపెట్టిన ప్రాజెక్టు తెలంగాణ ప్రజల సాగు, తాగు నీటికి ముక్తి కలిగిస్తుంది’ అని గవర్నర్ అన్నారు.

కాళేశ్వరం ప్రాజెక్టు ద్వారా వ్యవసాయ, పారిశ్రామిక, ఆర్థిక రంగాల్లో విశేష అభివృద్ధి జరుగుతుందని గవర్నర్ అన్నారు. ‘సీఎం కేసీఆర్, మంత్రి హరీశ్ రావుకు అభినందనలు. హరీశ్ రావు దేహమంతా కాళేశ్వరం ప్రాజెక్ట్‌తో నిండిపోయింది. ఇక నుంచి ఆయణ్ని కాళేశ్వర్‌ రావు అని పిలిస్తే బాగుంటుంది’ అని నరసింహన్ అన్నారు.

‘కాళేశ్వరం ప్రాజెక్ట్ నభూతో నభవిష్యత్ అన్నట్లుగా ఉంది. ప్యాకేజీ-6లో ఏకంగా గోదావరి నదినే అంతర్వాహినిగా తరలించుకొచ్చారు. సర్జ్‌పూల్ చూసినప్పుడు అదొక ఇంజినీరింగ్ అద్భుతంగా తలపించింది. ఇంతకాలం సరస్వతి నది మాత్రమే గుప్తనదిగా ఉండేది.. ఇప్పుడు ఇక్కడ గోదావరిని కూడా గుప్తనదిగా మార్చారు’ అని గవర్నర్ అన్నారు.

ప్రాజెక్టులో పనిచేస్తు్న్న కార్మికులతోనూ మాట్లాడానని చెప్పిన గవర్నర్.. కార్మికులకు ఇచ్చే జీతాలు, భోజనం బాగున్నాయని కితాబిచ్చారు. శనివారం ఉదయం 8.40 గంటలకు ప్రత్యేక హెలికాప్టర్‌లో కాళేశ్వరం చేరుకున్న గవర్నర్.. ముక్తేశ్వర స్వామి ఆలయానికి చేరుకుని సతీమణితో కలసి ప్రత్యేక పూజలు చేశారు. అనంతరం కన్నెపల్లి, అన్నారం పంప్‌ హౌస్‌లకు చేరుకుని నిర్మాణ పనులను పరిశీలించారు. ఇంజినీర్లను అడిగి పనుల వివరాలను తెలుసుకున్నారు.