గుడివాడలో కొడాలి నానికి, వైసీపీకి ఝలక్!

గుడివాడలో ప్రతిపక్ష వైసీపీకి పెద్ద షాక్ తగిలింది. ఆ పార్టీ ఎమ్మెల్యే కొడాలి నాని ప్రధాన అనుచరుడు, గుడివాడ మున్సిపల్ కౌన్సిల్ చైర్మన్ యలవర్తి శ్రీనివాస రావు తన అనుచరులతో కలిసి సైకిల్ ఎక్కారు. తనకు కుడి భుజం లాంటి వ్యక్తి టీడీపీలోకి వెళ్లడాన్ని కొడాలి జీర్ణించుకోలేకపోతున్నారని తెలుస్తోంది. యలవర్తి‌తోపాటు వైసీపీకి చెందిన 9 మంది కౌన్సిలర్లు కూడా టీడీపీ బాట పట్టారు. వీరి చేరికతో గుడివాడ మున్సిపాలిటీ టీడీపీ ఖాతాలోకి చేరినట్లయింది. మంత్రి కొనకళ్ల నారాయణతో కలిసి వీరు ముఖ్యమంత్రి చంద్రబాబును కలిసి ఆదివారం ఉదయం టీడీపీ తీర్థం పుచ్చుకున్నారు.

గుడివాడలో వైసీపీకి 21 మంది, టీడీపీకి 15 మంది కౌన్సిలర్లు ఉన్నారు. ఇటీవలే వైసీపీకి చెందిన కౌన్సిలర్ ఒకరు మరణించడంతో ఆ పార్టీ బలం 20కి తగ్గింది. ఒకేసారి భారీగా కౌన్సిలర్లు పచ్చ కండువాలు కప్పుకోవడంతో గుడివాడ మున్సిపాలిటీలో టీడీపీ బలం 25కి చేరినట్లయింది. యలవర్తి సహా కౌన్సిలర్లు పార్టీని వీడకుండా కొడాలి నాని ఎంతగా ప్రయత్నించినప్పటికీ వారు ససేమిరా అన్నారని తెలుస్తోంది. వైసీపీలో ఉండలేమని వారు తెగేసి చెప్పినట్లు సమాచారం.