పెళ్లికొస్తాడనుకుంటే.. ప్రాణాలొదిలాడు: విలవిల్లాడిన హరికృష్ణ మిత్రుడు

స్నేహితుడి కుమారుడి వివాహానికి బయల్దేరిన హరికృష్ణ రోడ్డు ప్రమాదంలో మరణించడం తెలుగు ప్రజలను కలచివేసింది. కొడుకు పెళ్లికి వచ్చి.. వధూవరులను ఆశీర్వదిస్తాడని భావించిన ప్రాణమిత్రుడు.. ప్రమాదంలో ప్రాణాలు కోల్పోవడంతో.. మోహన్ ఒక్కసారిగా షాకయ్యారు. స్నేహితుడు ఇక లేడని తెలియగానే ఆయన భోరున విలపించారు. పెళ్లికి రావాల్సిన వాడు అనంత లోకాలకు తరలి వెళ్లాడంటూ.. వరుడి కుటుంబ సభ్యులు కన్నీటి పర్యంతమయ్యారు. దీంతో కళ్యాణ మండపంలో విషాధ ఛాయలు అలుముకున్నాయి.

నెల్లూరు జిల్లా కావలికి చెందిన మోహన్‌‌.. హరికృష్ణకు మంచి స్నేహితుడు. ఇటీవలే కుమారుడి వివాహానికి ఆయన స్వయంగా హరికృష్ణను ఆహ్వానించారు. బుధవారం మధ్యాహ్నం బృందావన్‌ కళ్యాణమండపంలో పెళ్లి ఉండటంతో.. ఆ సమయంలోగా కావలి వెళ్లడం కోసం హరికృష్ణ ఫార్చ్యునర్‌లో ఉదయాన్నే హైదరాబాద్ నుంచి బయల్దేరారు. కానీ దురదృష్టవశాత్తూ నల్లగొండ జిల్లా అన్నెపల్లి వద్ద జరిగిన రోడ్డు ప్రమాదంలో తీవ్రంగా గాయపడ్డారు. నార్కెట్‌పల్లిలోని కామినేని హాస్పిటల్లో చికిత్స పొందుతూ తుది శ్వాస విడిచారు.