Anna TDP: బాబుతో విబేధాలు, అన్న టీడీపీ ఏర్పాటు.. రెబల్ లీడర్ హరికృష్ణ

ఎన్టీఆర్ చైతన్య రథానికి రథసారథిగా వ్యవహరించిన హరికృష్ణ.. ఒకానొక దశలో చంద్రబాబు నాయుడి నాయకత్వాన్ని సవాల్ చేశారు. ఎన్టీఆర్ నుంచి పార్టీ పగ్గాలను, సీఎం పదవిని బాబు చేజిక్కించుకున్న టైంలో హరికృష్ణ బావకే మద్దతు పలికారు. బాబు హయాంలో రవాణ శాఖ మంత్రిగా పనిచేశారు. 1996లో హిందూపురం అసెంబ్లీ స్థానానికి జరిగిన ఉప ఎన్నికలో హరికృష్ణ గెలుపొందారు.

ఎమ్మెల్యేగా కానప్పటికీ చంద్రబాబు హరికృష్ణను మంత్రివర్గంలోకి తీసుకొన్నారు. కానీ మంత్రి వర్గం నుంచి హరికృష్ణ తప్పుకొన్నారు. చంద్రబాబుతో విబేధించిన ఆయన.. 1999 జనవరి 26న అన్న టీడీపీని ఏర్పాటు చేశారు. ఆ సందర్భంలో చంద్రబాబు ప్రభుత్వం అవినీతిలో కూరుకుపోయిందని ఆయన తీవ్రంగా విమర్శించారు. కమ్యూనిస్టు పార్టీలతో కలిసి ఎన్నికల్లో పోటీ చేశారు. దీంతో హరికృష్ణ చంద్రబాబును దెబ్బతీస్తారని భావించారు. కానీ ఎన్నికల ఫలితాలు అందుకు విరుద్ధంగా వెలువడ్డాయి.

అన్న టీడీపీ 191 స్థానాల్లో ఆయన పోటీ చేయగా.. ఒక్క సీటు కూడా గెలవలేదు. ఆ పార్టీకి కేవలం 1.12 శాతం ఓట్లు మాత్రమే దక్కాయి. దీంతో ఆయన క్రమంగా రాజకీయాలకు దూరంగా మెలిగారు. తర్వాత 2008 నాటికి మళ్లీ చంద్రబాబుతో ఆయన సంబంధాలు మెరుగయ్యాయి. దీంతో ఆయన టీడీపీలో చేరి రాజ్యసభ సభ్యుడిగా ఎన్నికయ్యారు. పార్టీ పొలిట్ బ్యూరో‌ సభ్యత్వం కూడా ఆయనకు దక్కింది.

నారా, నందమూరి కుటుంబాలు కలిసిపోవడంతో.. హరికృష్ణ సూచన మేరకు జూనియర్ ఎన్టీఆర్ 2009 ఎన్నికల్లో టీడీపీ తరఫున విస్తృతంగా ప్రచారం నిర్వహించారు. రాష్ట్ర విభజన సమయంలో హరికృష్ణ పార్టీ నిర్ణయాన్ని ధిక్కరించారు. తెలంగాణ ఏర్పాటుకు అనుకూలంగా పార్టీ లేఖ ఇవ్వగా.. విభజనను వ్యతిరేకిస్తూ హరికృష్ణ ఎంపీ పదవికి రాజీనామా చేశారు. పెద్ద కుమారుడు జానకీరామ్ రోడ్డు ప్రమాదంలో మరణించిన తర్వాత ఆయన బాగా కుంగిపోయారు. అప్పటి నుంచి రాజకీయాలకు దూరంగా ఉంటున్న ఆయన కుటుంబంతోనే ఎక్కువ సమయం గడుపుతున్నారు.