భాగ్యనగరంలో భారీ వర్షం...నగరవాసుల పాట్లు

హైదరాబాద్ నగరంలో శుక్రవారం సాయంత్రం కురిసిన భారీ వర్షానికి నగరవాసులు పలు ఇక్కట్లు పడ్డారు. ముఖ్యంగా వాహనచోదకులైతే ఈ వర్షంలో చుక్కలు చూశారు. కిలోమీటర్ల కొద్దీ వాహనాలు నిలిచిపోయి భారీ ఎత్తున ట్రాఫిక్ జామ్ ఏర్పడింది. వాహనాల రాకపోకలకు తీవ్ర అంతరాయం ఏర్పడటంతో వర్షంలోనే తడుస్తూ నిలిచిపోవాల్సి వచ్చింది. రోడ్లపై మోకాళ్ల లోతు వరకు నీరు చేరడంతో పలు చోట్ల వాహనాలు మొరాయించాయి. పంజాగుట్ట, మాదాపూర్, బంజారాహిల్స్, చందానగర్, యూసఫ్ గూడ, కూకట్ పల్లి, హైదర్షాకోట్, చాంద్రాయణగుట్ట, ఆల్విన్ కాలనీ, గోషామహల్, అమీర్ పేట, ఖైరతాబాద్ ఇలా అన్ని ప్రాంతాలు జోరువానలో మోకాళ్లు లోతు నీళ్లలో నిలిచాయి. రోడ్లపై నీరు చేరి వాగులను తలపించాయి. చాలా ప్రాంతాల్లో విద్యుత్ సరఫరాకు తీవ్రంగా ఆటంకం ఏర్పడింది.